काठमाडौँ — भदौ २३ र २४ को जेन–जी आन्दोलन र प्रदर्शनमा दमन गरेको भन्दै जाँचबुझ आयोगको सिफारिसका आधारमा पक्राउ परेका तत्कालीन प्रधानमन्त्री एवं एमाले अध्यक्ष केपी शर्मा ओलीले कानुनी प्रतिवादका लागि तयारी गरेका छन् ।

ओली सरकारका महान्याधिवक्ता रमेश बडाल र वरिष्ठ अधिवत्ता टीकाराम भट्टराईसँग पक्राउ पर्नुअघि ओलीले कानुनी परामर्श गरेका थिए । ओली पक्राउ परेपछि बडालले सबै कानुनी प्रक्रिया अनुसार प्रतिवाद गर्ने बताए ।

‘आयोगको प्रतिवेदन आफैमा राजनीतिक प्रतिशोधपूर्ण देखिन्छ । घटनाको तथ्य र निश्कर्षमा मेल खाँदैन । त्यसैले यो गैरकानुनी देखिन्छ’ उनले भने, ‘हामीले बन्दीप्रत्यक्षीकरण लगायत संविधान र कानुनले व्यवस्था गरे अनुसार सबै तयारी सुरु गरेका छौं ।’ 

उनले आयोगका अध्यक्ष गौरीबहादुर कार्कीको प्रतिवेदन तथ्यका आधारमा नभई पूर्वाग्रही रुपमा तयार गरिएको आरोप लगाए ।