क्याप्टेनसहित पाँच जना सवार मुस्ताङ एयरको हेलिकोप्टर दोलखातर्फ जाँदै गर्दा सम्पर्कविहीन भएको हो भने खोज तथा उद्धार कार्यको तयारी भइरहेको छ।
काठमाडौँ — काठमाडौंबाट दोलखाको लाप्चाका लागि आज बिहान करिब १०:२५ बजे उडेको मुस्ताङ एयरको नाइनएन-एएनओ नम्बरको हेलिकोप्टर सम्पर्कविहीन भएको छ। उक्त हेलिकोप्टर लाप्चामा ल्यान्ड गरेर उडेको केही मिनेटमै सम्पर्कविहीन भएको नागरिक उड्डयन प्राधिकरणका एक उपमहानिर्देशकले बताए ।
प्राप्त प्रारम्भिक जानकारी अनुसार हेलिकोप्टरमा क्याप्टेन सुरज थापा क्षेत्रीसहित कुल ५ जना सवार थिए। उडान सुरु भएको केहीपछि हेलिकोप्टरसँग सम्पर्क टुटेको र हालसम्म यसको अवस्थाबारे आधिकारिक पुष्टि हुन सकेको छैन।
सम्बन्धित निकायहरूले खोज तथा उद्धार कार्य सुरु गर्ने तयारी गरिरहेका छन्। दोलखाको लाप्चामा हराएको आशंका गरिएको छ । दोलखा आसपासमा पानी ठूलो परिरहरेकोले सम्भावित क्षेत्रमा जान कठिनाइ भइरहेको जनाइएको छ । दोलखाबाट सेना सम्भावित दुर्घटनाक्षेत्र तर्फ पठाइसकिएको छ । थप विवरण आउन बाँकी रहेको छ।
