संघका महासचिव भरतबहादुर चन्दका अनुसार संघ अन्तर्गतका अस्पतालले प्रवाह गर्ने सेवाकै कारण छिमेकी मुलुक भारत, बंगलादेश, भुटान लगायतका मुलुकका नागरिकसमेत नेपालमा आँखा उपचारका लागि आउने गरेका छन् । सन् २०२५ मा मात्र संघको सञ्जालमार्फत ९ लाख ११ हजार ९८० जना अन्य देशका नागरिकको आँखा उपचार गरिएको उनले बताए । 'त्यसमा १ लाख ५३ हजार ८६  बिरामीहरुको शल्यक्रिया गरिएको छ । यसमा अधिकांश भारतीय नागरिकहरु छन्,' उनले भने ।

नेपालमा उपलब्ध उच्चस्तरीय आँखा उपचार सेवाका कारण विदेशी नागरिकहरू समेत उपचारका लागि नेपाल आउने क्रम निरन्तर बढिरहेको उनको भनाइ छ ।

संघका अध्यक्ष प्राडा चेजराज पन्तले नेपालमा आँखा उपचारका क्षेत्रमा धेरै विकास भए तापनि अझै पनि धेरै नेपाली आँखा उपचारसम्बन्धी जनचेतनाको अभावमा उपचारबाट वञ्चित रहेको बताए । उनका अनुसार नेपालका ७ वटै प्रदेशलाई समेट्ने गरी सन् २०२१ मा गरिएको  आरएएबी सर्वेले समेत आँखा उपचारसम्बन्धी जनचेतनाका अभावमा सबैभन्दा बढी नागरिकहरु आँखा उपचार सेवाबाट वञ्चित रहेको देखाएको छ ।