पोखरा — धनुष बचत तथा ऋण सहकारी संस्थाको रकम हिनामिना आरोपमा पक्राउ परेका कृष्णप्रसाद जैसीलाई रास्वपा सभापति रवि लामिछानेको मुद्दासँग जोडिएकोप्रति सूर्यदर्शन बचत तथा ऋण सहकारी संस्थाले ध्यानाकर्षण भएको जनाएको छ । 

पोखरास्थित सूर्यदर्शन सहकारीले मंगलबार विज्ञप्ति जारी गर्दै रवि लामिछानेविरुद्ध जाहेरी दिने व्यक्ति जैसी मात्र नभएको स्पष्ट पारेको हो । 'सूर्यदर्शन सहकारीको मुद्दा प्रकरणमा पहिलो मुद्दाका जाहेरवाला र पूरक तथा थप मुद्दाका जाहेरवालाहरू फरक–फरक व्यक्तिका नाममा दर्ता गरिएको छ । हरेक मुद्दाका मिति पनि फरक-फरक छन्,' विज्ञप्तिमा भनिएको छ, 'कृष्णप्रसाद जैसीको जाहेरीमा रवि लामिछानेको मुद्दाको सुरूआत गरिएको होइन ।'

विज्ञप्तिमा जैसीको व्यक्तिगत विषयलाई संस्थाको मानमर्यादा र रवि लामिछानेविरुद्धको मुद्दासँग जोडेर प्रचार नगर्न आग्रह गरेको छ ।

धनुष सहकारीको १२ करोड ५६ लाख रुपैयाँ अपचलन गरेको अभियोगमा आइतबार पक्राउ परेका जैसी सूर्यदर्शन सहकारीका पीडितका रूपमा परिचित थिए । जीबी राईसहित ७ जनाविरूद्ध सुरूआती जाहेरी उनको नामबाट परे पनि लामिछानेविरूद्धको पुरक जाहेरी भने गोविन्दप्रसाद अधिकारीको नाममा रहेको सूर्यदर्शन सहकारी सञ्चालक समिति अध्यक्ष किरण श्रेष्ठले बताए ।

श्रेष्ठ यसअघि सूर्यदर्शन बचतपीडित संघर्ष समितिका संयोजक थिए । सहकारीको गत मंसिरमा भएको विशेष साधारणसभाले उनलाई अध्यक्ष चुनेको थियो ।

जैसी धनुष सहकारीको ऋण उपसमितिमा रहँदा कृत्रिम खाता सिर्जना गरी ८२ लाख रुपैयाँ अपचलन गरेको वित्तीय विश्लेषण प्रतिवेदनमा उल्लेख छ । सोही आधारमा कास्की प्रहरीले उनलाई पक्राउ गरी अनुसन्धान अघि बढाएको छ ।

तर, सूर्यदर्शन सहकारीले भने जैसी केवल एक 'पीडित बचतकर्ता' र 'सामान्य जाहेरवाला' मात्र भएको जिकिर गर्दै धनुष सहकारीको प्रकरणलाई सूर्यदर्शनसँग जोडेर विषयवस्तु मोड्न खोजिएको भन्दै आपत्ति जनाएको छ।