महान्यायाधिवक्ता कार्यालयले सर्वोच्च अदालतको मागअनुरूप लामिछानेको मुद्दा फिर्ता गर्ने निर्णय संशोधनसम्बन्धी फाइल पेस गरेपछि पुनः सुनुवाइ भएकाे हो ।
काठमाडौँ — राष्ट्रिय स्वतन्त्र पार्टी (रास्वपा) का सभापति रवि लामिछानेमाथि सहकारी ठगीसँगै दायर भएको संगठित अपराध र सम्पत्ति शुद्धीकरण मुद्दाको अभियोगपत्र फिर्ताविरुद्धको रिट हेर्दाहेर्दैमा छ ।
विनाेद शर्मा र अब्दुल अजिज मुसलमानकाे इजलासमा साेमबारवाट सुरु भएकाे सुनुवाइ मंगलबार पनि हेर्दाहेर्दैमा राखिएकाे थियाे । साेमबार रिट निवेदकका तर्फबाट वरिष्ठ अधिवक्ताहरु दिनेश त्रिपाठी र सुरेन्द्र भण्डारीले बहस गरेका थिए। आज रिट निवेदकका तर्फबाट थप बहस गरिने र महान्यायाधिवक्ता सविता भण्डारी बरालले आफ्नो निर्णयबारे जवाफ दिनेछिन्।
यसअघि न्यायाधीश सारंगा सुवेदी र सुनिलकुमार पोखरेलको इजलासले लामिछानेसहितको मुद्दा संशोधनको निर्णय सच्चाइएको फाइल झिकाउन आदेश गरेकाे थियो । आइतबार महान्यायाधिवक्ताको कार्यालयले सर्वोच्च अदालतको मागअनुरूप लामिछानेको मुद्दा फिर्ता गर्ने निर्णय संशोधनसम्बन्धी फाइल सर्वोच्च अदालतमा पेस गरेपछि पुनः सुनुवाइ भएकाे हो ।
महान्यायाधिवक्ता भण्डारीले लामिछानेमाथि विभिन्न जिल्लामा विचाराधीन रहेको सहकारी ठगीसँगै संगठित अपराध र सम्पत्ति शुद्धीकरण मुद्दा संशोधन गर्न जिल्ला सरकारी वकिल कार्यालयलाई निर्देशन दिएकी थिइन् । त्यसविरुद्व वरिष्ठ अधिवक्ता दिनेश त्रिपाठी , युवराज सफल र आयुष वडालले रिट दायर गरेका थिए।
