कालीकोट — गणित सुधार्न भन्दै पढाइका लागि साथीको घरमा आउजाउ गर्थिन् । घरमा आएका बेला साथीका बुवाले के खायौ ? कसो गर्‍यौ भनेर चासो दिन्थे । गाउँकै ती पुरुष नाताले उनका हजुरबुवा पर्छन् । भेट्यो कि केही समस्या परे भन्नु है भन्थे । कहिलेकाहीँ सुटुक्क पैसा पनि दिन्थे । औधी माया देखाउँथे । गत पुसमा केही सामान आवश्यक परेमा किन्नु है भनेर ५ सय रुपैयाँ दिएका थिए । 

साथीकी आमा छोरा–छोरी पढाउन गत तिहारदेखि काठमाडौंमा छन् । घरमा पत्नी नभएका ती पुरुषको मनमा पाप पलाएको उनलाई पत्तै भएन । आफ्ना आमा–बुवा घरमा नभएकाले अभिभावक जस्तो ठानिन् । नियमित आउजाउ भइरहेको थियो । तर, गत माघ १२ मा खाना पाक्न ढिलो भएकाले उनी साथीको घर गइनन् । अर्को दिन साँझ जाँदा हिजो किन आइनौ भनेर सोधी खोजी गरे । ‘तिमी नआउँदा त मलाई नियास्रो लाग्छ भने,’ बालिकाले सुनाइन्,‘ त्यसदिन साँझ ९ बजेसम्म पढ्यौं । अनि साथी र म सवा ९ बजेतिर भुइँमा ओछ्यान लगाएर सुत्यौं ।’ 

साथीका बुवा छुट्टै सुतेका थिए । तर, राति १० बजेतिर एक्कासि सुतेको ठाउँमा आएर जबरजस्ती गर्न थालेको उनले सुनाइन् । ‘कराउन खोजेँ । मुख थुनेर जबरजस्ती गरे,’ उनले भनिन्, ‘अनि बाहिर लगेर ५ सय दिए । कसैलाई नभन्नु, भन्यौ भने मारी दिन्छु, नभने माया गर्छु भने ।’ जिल्लाकी १३ वर्षीया बालिकाका अनुसार माघ १४ को बिहान साथी चर्पी गएका बेला पनि जबरजस्ती गरेको सुनाइन् । रास्कोट–१ का ५३ वर्षीयले जबरजस्तीकरणी गरेर गर्भवती बनाएको खुलेको छ ।

गत माघ १३ मा घरमा आएका बेला बालिकालाई ललाइफकाइ बलात्कार गरेर गर्भवती बनाएको जाहेरी परेपछि फागुन २७ मा आरोपितलाई पक्राउ गरिएको जिल्ला प्रहरी प्रमुख डीएसपी हिमबहादुर खत्रीले बताए । ‘छोरीसँग घरमा आएका बेला पैसा दिएर बलात्कार गरेको बुझिएको छ,’ उनले भने ‘जन्मदर्तामा बालिकाको उमेर १० वर्ष उल्लेख छ ।’ तर, वास्तविक उमेर १३/१४ वर्षजस्तो देखिने खत्रीले बताए । उनका अनुसार बालिकाका बुवा दोस्रो विवाह गरेर भारतको बैंग्लोर गएका छन् । त्यसपछि आमाले पनि दोस्रो बिहे गरिन् । बालिका घरमा हजुरआमासित बस्दै आएकी छन् । 

आरोपितकी छोरी र पीडित बालिका सँगै पढ्ने भएकाले साथीको घरमा आउजाउ भइरहन्थ्यो । डीएसपी खत्रीले बालिकाले भने अनुसार पीडकले बलात्कार गरेपछि कसैलाई भने मारी दिने धम्की दिएका थिए । आरोपित व्यक्तिले पहिलो पटक ५, दोस्रो पटक ५ र तेस्रो पटक २ सय रुपैयाँ दिएको बालिकाले बयानमा उल्लेख गरेकी छन् । अनुसन्धान अधिकृत प्रहरी निरीक्षक गणेश ज्ञवालीले ललाइफकाइ करणी गरेको देखिएको बताए । ‘आरोपितले पनि स्वीकार गरिसकेका छन्,’ उनले थपे, ‘जोखिममा रहेकी बालिकाको अवस्थाको फाइदा उठाएको देखिन्छ ।’ 

फागुनमा महिनावारी नभएपछि सोधीखोजी गर्दा जबरजस्ती करणीमा परेको खुलेको बालिकाकी फुपूले बताइन् । त्यसपछि इलाका प्रहरी कार्यालय रास्कोटबाट खटिएका प्रहरीले आरोपीलाई पक्राउ गरेको थियो । फागुन २८ मा जाहेरी परेको हो ।