काठमाडौँ — एनआरएनएको अध्यक्षमा सहमति जुटेको छ । सहमतिअनुसार अध्यक्ष हेमराज शर्मा चयन भएका छन् । अध्यक्ष पदका प्रत्यासी रविन बज्राचार्यले आइतबार साँझ पत्रकार सम्मेलन गरेर शर्मालाई समर्थन गरेका हुन् । उनले एकताको महाधिवेशन भएको र निर्वाचनमा जाँदा संघलाई आर्थिक भार पर्ने भएकोले अध्यक्षमा शर्मालाई समर्थन गरेको जानकारी गराए । 

अध्यक्षको दाबीबाट पछि हटेका बज्राचार्य उपाध्यक्ष पदमा रहन राजी भएका छन् । 

त्यस्तै यसअघि उम्मेदवारी फिर्ता लिएका रविन शेरचनलाई पनि उपाध्यक्ष पद दिइने भएको छ ।  

यससँगै एनआरएनएको सबै कार्यसमितिमा सहमति जुटेको निर्वाचन आयुक्त टीबी कार्कीले बताए । बाँकी पदहरुमा निर्वाचित भएकाहरुको नामावली सोमबार सार्वजनिक गर्ने समेत उनले बताए ।