नेपाली कांग्रेस प्युठानका उम्मेदवार डा. गोविन्दराज पोख्रेलले प्रतिनिधि सभा निर्वाचनमा खर्च भएको २४ लाख ८० हजार २१५ रुपैयाँ सार्वजनिक रूपमा विवरण प्रस्तुत गरेका छन्।
काठमाडौँ — नेपाली कांग्रेस प्युठानका तर्फबाट उम्मेदवार भएका डा. गोविन्दराज पोख्रेलले आफ्नो चुनावी खर्च सार्वजनिक गरेका छन् । प्रतिनिधि सभा सदस्य पदमा उम्मेदवार भएका पोख्रेलले निर्वाचन कार्यालय प्युठानलाई निर्वाचनमा खर्च भएको रकमको खर्च विवरण सार्वजनिक गरेका हुन् ।
पोख्रेलका अनुसार निर्वाचनमा २४ लाख ८० हजार २१५ रुपैयाँ खर्च भएको छ ।
पोख्रेलले निर्वाचन कार्यालयमा बुझाएको पत्र अनुसार २ वटा सवारी २५ दिनसम्म सञ्चालन गरेबापत ३ लाख ७५ हजार, हवाई खर्च ४ पटकको दुई जनाको ८० हजार, २६० जनालाई मतदाता प्रशिक्षण पालिकास्तरमा १ लाख ७५ हजार, ६४ वडामा प्रचारप्रसार ९ लाख ६० हजार, सम्पर्क कार्यालय खर्च जुम्री र ६४ वडामा ६ लाख ४० हजार, प्रचारप्रसार सामग्रीमा २ लाख ४० हजार र मनोनयन दर्ता गर्दा १० हजार गरी कुल २४ लाख ८० हजार २१५ रुपैयाँ खर्च भएको घोषणा गरेका छन् ।
पोख्रेलले नेपाल इन्भेस्टमेन्ट बैंक बिजुवारमा खाता खोली निर्वाचन खर्च त्यसैअनुसार गरेको बताएका छन् ।
