काठमाडौँ — सशस्त्र प्रहरी महानिरीक्षक राजु अर्यालले निर्वाचन सुरक्षालाई सुरक्षित र भयरहित वातावरणमा सम्पन्न गराउनु अग्निपरीक्षा रहे पनि सफलतापूर्वक जिम्मेवारी पूरा गरी उत्तिर्ण भएको बताएका छन् । निर्वाचन सुरक्षा तथा व्यवस्थापनमा खटिएका उच्च पदस्थ अधिकारीहरूलाई सोमबार सशस्त्र प्रहरी मुख्यालयमा सम्बोधन गर्दै महानिरीक्षक अर्यालले भयरहित वातावरणमा निर्वाचन सुरक्षा व्यवस्थापन गरेर उत्कृष्ट जिम्मेवारी निर्वाह गरेकामा आभार व्यक्त गरे ।

मुख्यालयमा उपस्थित विभाग प्रमुख, निर्वाचन सुरक्षा अनुगमनमा खटिएका वरिष्ठ उपरीक्षक तथा उपरीक्षक र भर्चुअल माध्यमबाट सबै प्रदेशका बाहिनीपति, देशभरका कार्यालय प्रमुख तथा सबै तहका कर्मचारीहरुलाई महानिरीक्षक अर्यालले चुनौतीको सामना गरेर निर्वाचनलाई भयरहित वातावरणमा सम्पन्न गरेकामा धन्यवाद दिए ।

निर्वाचन सुरक्षित रुपमा सम्पन्न हुनुका पछाडि फौजहरूले निर्वाचन सुरक्षा व्यवस्थापनमा देखाएको दृढ अनुशासन, इमानदारिता र देशलाई परेको समयमा ज्यानको समेत प्रवाह नगरी जिम्मेवारी पूरा गर्नुपर्छ भन्ने सोच र भावना हुनुपर्छ भन्ने तथ्य नै मूल कारण रहेको बताए । २१ फागुनको निर्वाचन र त्यसअघिको व्यवस्थापनमा सशस्त्र प्रहरीका करिब ३५ हजार जनशक्ति फिल्डमा खटिएका थिए । निर्वाचनमा दोस्रो सुरक्षा घेराका रुपमा सशस्त्रलाई तैनाथ गराइएको थियो । ‘२१ फागुनमा सम्पन्न प्रतिनिधिसभा सदस्य निर्वाचन सुरक्षा फौजको लागि अग्नि परीक्षा जस्तो भएको थियो तर सफलतापूर्वक सम्पन्न भएको छ, यस अवसरमा सशस्त्र प्रहरी कर्मचारीहरूको पेशागत दक्षताको समेत संगठनले उच्च मुल्यांकन गरेको छ ।’