काठमाडौँ — सोलुखुम्बुको मतदान केन्द्रमा तनाव भएको भन्दै पुरानो भिडियो सामाजिक सञ्जालमा भाइरल भएको छ । सामाजिक सञ्जाल फेसबुकमा भीमराज बुढाथोकी नामक प्रयोगकर्तासहित कतिपयले सोलुखुम्बुमा लफडा भएछ भन्दै यो भिडियो राखेका छन् । 

भिडियोमा सेनाले बन्दुक तेर्स्याउँदै गरेको समेत देखिन्छ । तर, सैनिक प्रवक्ता राजाराम बस्नेतका अनुसार, अहिले सामाजिक सञ्जालमा भाइरल भएको भिडियो पुरानो हो । 'मैले पनि त्यो भिडियो हेरेँ, पुरानो अभ्यासका बेलाको भिडियो सामाजिक सञ्जालमा हालिएको रहेछ,' उनले भने, 'अहिले सोलुखुम्बुमा त्यस्तो कुनै समस्या भएको छैन ।' 

कोशी प्रदेश प्रहरी प्रमुख डीआईजी विनोद घिमिरे पनि सोलुखुम्बुमा शान्तिपूर्वक रूपमा निर्वाचन भइरहेको बताए । 'अहिलेसम्म प्रदेशमा कुनै समस्या छैन,' उनले भने ।