काठमाडौं — प्रेस काउन्सिल नेपालले प्रतिनिधिसभा सदस्य निर्वाचनका सन्दर्भमा मौन अवधिमा निर्वाचन आचारसंहिता कडाइका साथ पालना गर्न सञ्चारमाध्यम, पत्रकार तथा सामाजिक सञ्जाल प्रयोगकर्तालाई अपिल गरेको छ । 

काउन्सिलले २१ फागुनमा हुने प्रतिनिधिसभा सदस्य निर्वाचनका लागि दल तथा उम्मेदवारले प्रचार गर्न पाउने समय आज राति १२ बजेसम्म मात्र रहेको र त्यसपछि मौन अवधि (स्थिर समय) सुरु हुने जनाएको छ । 

निर्वाचन आचारसंहिता, २०८२ को दफा २५(५) बमोजिम मतदान हुने दिनभन्दा ४८ घण्टाअघि देखि मतदान केन्द्र बन्द नहुन्जेलसम्म राजनीतिक दल वा उम्मेदवारको पक्ष वा विपक्षमा प्रभाव पार्ने किसिमका समाचार, लेख, विश्लेषण, अन्तर्वार्ता, टिप्पणी तथा प्रचारात्मक सामग्री प्रकाशन/प्रसारण गर्न नपाइने व्यवस्था रहेको काउन्सिलले स्मरण गराएको छ । 

काउन्सिलले मौन अवधिमा राजनीतिक दल तथा उम्मेदवारसँग सम्बन्धित प्रचार सामग्री, सभा सम्मेलनका समाचार, तस्बिर, चुनाव चिन्ह अंकित सामग्री, श्रव्यदृश्य सामग्रीलगायत कुनै पनि किसिमका प्रचारात्मक विषयवस्तु प्रकाशन वा प्रसारण नगर्न आग्रह गरेको छ । 

मौन अवधिमा आचारसंहिता उल्लंघन भएमा पत्रकार आचारसंहिता, २०७३ (पहिलो संशोधन २०७६) तथा निर्वाचन आचारसंहिता, २०८२ बमोजिम कारबाही प्रक्रिया अघि बढाइने काउन्सिलले जनाएको छ । साथै, आचारसंहिता उल्लंघनका विषय सञ्चारमाध्यमको अभिलेखीकरण, वर्गीकरण तथा लोककल्याणकारी विज्ञापन सिफारिस प्रक्रियामा समेत आधार बन्न सक्ने चेतावनी दिएको छ ।