वीरगन्जमा शुक्रबार गृह मन्त्रालय अन्तर्गतको केन्द्रीय सुरक्षा समितिका पदाधिकारीसहितको ‘निर्वाचन सुरक्षा वर्तमान अवस्थाः चुनौती र समाधान’ विषयक बैठकमा सहभागी भएपछि सन्चारकर्मीहरुसँगको भेटमा गृहमन्त्री अर्यालले यस्तो बताएका हुन् ।
What you should know
पर्सा — गृहमन्त्री ओमप्रकाश अर्यालले जनताले ढुक्क भएर मतदान गर्ने अवस्था रहेको दाबी गरेका छन् ।
वीरगन्जमा शुक्रबार गृह मन्त्रालय अन्तर्गतको केन्द्रीय सुरक्षा समितिका पदाधिकारीसहितको ‘निर्वाचन सुरक्षा वर्तमान अवस्थाः चुनौती र समाधान’ विषयक बैठकमा सहभागी भएपछि सन्चारकर्मीहरुसँगको भेटमा गृहमन्त्री अर्यालले यस्तो बताएका हुन् । ‘जनताले ढुक्क भएर मतदान गर्ने अवस्था छ,’ उनले भने, ‘यस पटक हामी सुरक्षासँगै राजनीतिक सुशासन पनि दिन्छौं ।’
यसअघिका निर्वाचनमा प्रशासनिक सुशासनको कुरो मात्र हुने गरेकोमा यस पटकको निर्वाचनमा निर्वाचन आयोगले राजनीतिक सुशासनको पनि जग बसाल्ने उनले बताए ।
कानुन उल्लंघन गर्ने जोकोहीलाई पनि यो अन्तरिम/नागरिक सरकारले कानुनको दायरामा ल्याउने उनले बताए । पर्सा, बारा र रौतहट जिल्लाको स्थलगत अनुगमनपछि आफूले यी जिल्लामा निर्वाचनलाई लिएर खासै ठूलो चुनौती नपाएको पनि उनले बताए ।
‘हामीले तीनवटै जिल्लामा त्यस्तो खासै ठूलो सुरक्षा चुनौती पाएनौं,’ उनले भने, ‘जति पनि समस्या र चुनौती छन् तिनलाई जिल्ला सुरक्षा समितिले नियन्त्रण र कानुनी कारबाहीको दायरामा ल्याएको पाइयो ।’ जिल्लाहरुमा सुरक्षाको प्रत्याभूति दिने गरी सम्पूर्ण तयारी गरेको पाइएको पनि अर्यालले बताए ।
यसअघि बैठकमा गृहमन्त्री अर्यालले जिल्लास्थित सुरक्षा निकायका प्रमुखहरुलाई आफ्नो मनोबल र उत्प्रेरणा बढाउन निर्देशन दिँदै सरकारले निर्वाचन सम्पन्न गर्न स्रोत, साधन र जनशक्ति अभाव हुन नदिने प्रतिबद्धता जनाएका थिए । सुरक्षा प्रमुखहरुलाई कुनै दुविधा भए गृह मन्त्रालयले तुरुन्तै निकास र निर्देशन दिने पनि उनले वचनबद्धता जनाएका थिए ।
बैठकमा कार्यवाहक प्रमुख निर्वाचन आयुक्त रामप्रसाद भण्डारी, सशस्त्र प्रहरी महानिरीक्षक राजु अर्याल, नेपाल प्रहरीका मधेश प्रदेश प्रमुख डीआईजी गोविन्द थपलिया, पर्सा र बाराका प्रमुख जिल्ला अधिकारी, नेपाल र सशस्त्र प्रहरी उपरीक्षक, सेनाका गणपतिहरुसमेत सहभागी थिए ।
दुवै जिल्लाका प्रजिअ र सुरक्षा निकाय प्रमुखहले सुरक्षा अवस्थाबारे गृहमन्त्रीलाई जानकारी गराएका थिए ।
