काठमाडौँ — काठमाडौं विश्वको तेस्रो प्रदूषित सहर बनेको छ । शुक्रबार अपराह्नको रेकर्डअनुसार काठमाडौं उपत्यकाको वायु गुणस्तर सूचकांक (एक्यूआई) १५९ पुगेको छ ।

यो स्तर ‘सबैका लागि अस्वस्थ’ श्रेणीमा पर्छ । विशेषगरी बालबालिका, ज्येष्ठ नागरिकका साथै श्वासप्रश्वास र मुटुरोगीलाई यो तहको प्रदूषणले बढी असर पार्न सक्छ । 

एक्यूआईअनुसार भियतनामको हनोई सहर सबैभन्दा बढी प्रदूषित देखिएको छ । जहाँ वायु प्रदूषणको तह १६५ छ भने विश्वको दोस्रो प्रदूषण सहर पाकिस्तानको लाहोरमा छ । शुक्रबार अपराह्नको रेकर्डअनुसार यहाँ प्रदूषणको तह १६२ रहेको छ ।

एक्यूआई मापदण्डअनुसार शून्यदेखि ५० सम्मलाई ‘राम्रो’ (हरियो संकेत), ५१ देखि १०० सम्म ‘सचेत रहनुपर्ने’ (पहेँलो संकेत), १०१ देखि १५० सम्म ‘अस्वस्थ’ श्रेणीमा राखिएको छ । अस्वस्थ तहले विशेषगरी श्वासप्रश्वास र मुटु रोगीलाई असर गर्न सक्ने विज्ञ बताउँछन् । १५१ देखि २०० ‘सबैका लागि अस्वस्थ’, २०१ देखि ३०० ‘धेरै अस्वस्थ’ र ३०० भन्दा माथि ‘अत्यन्त खतरनाक’ मानिन्छ ।