काठमाडौँ — ​प्रधान सेनापति अशोकराज सिग्देलले प्रभावकारी रुपमा निर्वाचन सुरक्षा व्यवस्थापन गर्न निर्देशन दिएका छन् । कोशी प्रदेशस्थित पूर्वी पृतना र मधेशस्थित मध्य पूर्वी पृतना हेडक्वाटर तथा अन्तर्गतका युनिटहरूको निरीक्षणका  क्रममा प्रधानसेनापति सिग्देलले निर्वाचन सुरक्षालाई त्रुटीरहित ढंगबाट निर्वाह गर्न निर्देशन दिएका हुन् । 

२१ फागुनमा देशभर एकै चरणमा मतदान हुँदैछ । निर्वाचन सुरक्षामा सेनाका करिब ८० हजार जनशक्ति फिल्डमा तैनाथ भएका छन् । केन्द्रीय सुरक्षा समितिबाट स्वीकृत निर्वाचन एकीकृत सुरक्षा कार्ययोजनाअनुसार निर्वाचनमा बाहिरी सुरक्षा घेराको जिम्मा सेनालाई दिइएको छ ।

मतदानपछि मतपेटिका मतगणना स्थलसम्म पुर्‍याउन पनि प्रहरी र सशस्त्रका अलवा सेना पनि खटिने गरी सुरक्षा योजना बनेको छ । १६५ निर्वाचन क्षेत्रमै अस्थायी बेस बनाएर मतदान स्थल सुरक्षामा बाहिरी घेरामा खटिएको सेनालाई निर्वाचनविरोधी गतिविधि भएका वा अप्रिय अवस्था निम्तिएमा २० मिनेट भित्र घटनास्थल पुग्ने गरी सेना तैनाथ भएका छन् ।

करिब ७१ हजार प्रहरी, करीब ३५ हजार सशस्त्र र १ लाख ४९ हजार निर्वाचन प्रहरी सुरक्षामा खटिएका छन् । प्रधानसेनापति सिग्देलले भयरहित रूपमा  चुनाव सम्पन्न गर्नु सबैको राष्ट्रिय दायित्व भएको र यसलाई मनन गरेर तैनाथ हुन निर्देशन दिएका हुन् ।

मंगलबार मात्रै प्रधानमन्त्री सुशीला कार्कीले निर्वाचन सुरक्षा र भए गरेका कामकारबाहीबारे गृह र रक्षा मन्त्रालय तथा चारवटै सुरक्षा निकायका प्रमुखहरूसँग जानकारी लिएकी थिइन् । मंगलबार नै केन्द्रीय सुरक्षा समिति र निर्वाचन आयोगमा उच्चस्तरीय निर्वाचन सुरक्षा समितिमा निर्वाचन व्यवस्थापन र सुरक्षाबारे छलफल भएको थियो । त्यसको भोलिपल्टै प्रधानसेनापति सिग्देल पूर्वी पृतना हेडक्वाटर र मध्य पूर्वी पृतना क्षेत्र पुगेर सुरक्षा अवस्थाबारे जानकारी लिनुका साथै निर्देशन दिएका हुन् ।