सोलुखुम्बु — हिउँदयाम सकिनै लाग्दा हिमाली जिल्ला सोलुखुम्बुमा यसवर्ष पहिलोपटक हिमपात भएको छ । मंगलबार दिउँसोबाट मौसममा बदली आएसँगै सोलुका उच्च भेगमा हिमपात भएको हो । 

माथिल्लो खुम्बु क्षेत्र र तल्लो सोलुको उच्च पहाडी भेग हिउँले सेताम्मे भएका छन् । छिटपुट वर्षासँगै भएको हिमपातले चिसो बढेको छ । हिमपातका कारण खुम्जुङ, नाम्चे, पिके र पताले डाँडाहरूमा बाक्लो हिउँ जमेको छ । हिउँ परेपछि किसानहरू खुसी भएको पतालेका प्रकाश मगरले बताए । हिमपात भए पनि खुम्बु क्षेत्रको जनजीवन सामान्य रहेको जिल्ला प्रहरी प्रमुख डिएसपी मनोजित कुँवरले बताए ।

हिमपातले चिसो बढे पनि चुनावी गतिविधिमा कुनै असर नपरेको प्रमुख जिल्ला अधिकारी लिलाकुमारी केसी पाण्डेको भनाइ छ ।