लमजुङ — आसन्न प्रतिनिधिसभा निर्वाचनका लागि निर्वाचन आयोगले तोकेको प्रचारप्रसार सुरु हुन अझै समय बाँकी छ । तर, लमजुङका गाउँबस्तीमा भने चुनावी चहलपहल बढिसकेको छ ।

६ माघमा उम्मेदवारी दर्ता भएयता ठूला दलदेखि स्वतन्त्र उम्मेदवारसम्म मतदाताको चाहना, गुनासा र अपेक्षा बुझ्न गाउँ पुगेका छन् । जुलुस र आमसभा नगरे पनि भेला, बैठक र अन्तरक्रियालगायतले प्रारम्भिक चुनावी चहलपहल बढेको छ ।

निर्वाचन तालिकाअनुसार ४ फागुनपछि मात्र प्रचारप्रसार तथा घरदैलो कार्यक्रम गर्न पाइन्छ । तर, दलहरूले यसअघि नै संगठन सुदृढीकरण, मतदाता भेटघाट र स्थानीय मुद्दा संकलनलाई तीव्र बनाएका छन् ।

लमजुङमा एक स्वतन्त्रसहित १२ जना उम्मेदवार प्रतिस्पर्धामा छन् । कांग्रेस, एमाले, रास्वपा, नेकपासहितका दलले औपचारिक प्रचारअघि नै ‘मतदाताको नाडी छाम्ने’ रणनीति अपनाएका छन् ।

एमालेले सक्यो पालिकास्तरीय बैठक अभियान
एमालेका उपाध्यक्षसमेत रहेका उम्मेदवार पृथ्वीसुब्बा गुरुङ हाल जिल्लाका सबै पालिकामा देखिन थालेका छन् । उनी निर्वाचन तालिकाअघि भइरहेका प्रचारप्रसारसम्बन्धी गतिविधिलाई पार्टीको नियमित काम बताउँछन् । ‘चुनावी प्रचारप्रसार सुरु भएको छैन । तयारी भने भइरहेको छ,’ उनले भने, ‘पार्टीका नियमित कार्यक्रममा सहभागी हुँदै मतदाताको चाहना बुझ्ने काम भइरहेको हो ।’

एमालेले ७ माघदेखि मध्यनेपाल नगरपालिकाबाट सुरु गरेको पालिकास्तरीय बैठक अभियान शुक्रबार दूधपोखरीमा सकिएसागै हालसम्म सबै पालिकामा सकेको छ ।

कांग्रेसले २० माघभित्रै सक्दै पालिकास्तरीय बैठक
कांग्रेसले पनि उम्मेदवार गमप्रसाद गुरुङसहित पालिकास्तरीय बैठकलाई तीव्र बनाएको छ ।

कांग्रेस जिल्ला सचिव कृष्णबहादुर अधिकारीका अनुसार २० माघभित्र सबै पालिकामा बैठक सक्ने लक्ष्य राखिएको छ । उनले भने, ‘उम्मेदवारी दर्तापछि उम्मेदवार र कार्यकर्ता मतदातासँग भेटघाटमा जानु स्वाभाविक प्रक्रिया हो ।’

रास्वपाको अन्तरक्रिया अभियान सुरु 
राष्ट्रिय स्वतन्त्र पार्टी (रास्वपा)ले १५ माघदेखि अन्तरक्रिया अभियान थालेको छ ।जिल्ला संयोजक अशोक सापकोटाका अनुसार उम्मेदवार धर्मराज केसीसहितको टोली विभिन्न पालिकामा चरणबद्ध रुपमा पुगेर मतदातासाग सिधा संवादमा जुटेको छ । ‘ठूला सभा भन्दा पनि प्रत्यक्ष संवादमा केन्द्रित भएका छौं,’ सापकोटाले भने ।

नेकपाको गाउँगाउँमा पालिकास्तरीय बैठक
नेकपाले उम्मेदवार हरिजङ तामाङसहित चुनावकेन्द्रित अभियान सुरु गरेको छ ।