काठमाडौँ — शिक्षा, विज्ञान तथा प्रविधिमन्त्रीबाट राजीनामा दिनुअघि महावीर पुनले आफूलाई प्राप्त राष्ट्रिय र अन्तर्राष्ट्रिय पदक सरकारलाई दान दिएका छन् । 

पुनले सामाजिक सञ्जालमार्फत मंगलबार ती पदक सरकारलाई दान दिएको जानकारी सार्वजनिक गरेका छन् । उनले लेखेका छन्, 'मैले पाएको सम्पूर्ण अन्तर्राष्ट्रिय र राष्ट्रिय पदकहरू नेपाल सरकार शिक्षा, विज्ञान तथा प्रविधि मन्त्रालयलाई सचिवज्यूमार्फत दान गरियो ।'

शिक्षामन्त्री महावीरले पनि दिए राजीनामा

आफूलाई प्राप्त पदक बेच्न चाहे पनि कसैले नकिनेपछि सरकारलाई दान दिएको पुनको भनाइ छ । 'यी पदकहरू बेचेर राष्ट्रिय आविष्कार केन्द्र र वीरगन्ज कृषि औजार कारखानामा दान गर्ने प्रयास गरेको कुरा सबैलाई थाहा नै होला । तर ४ वर्षसम्म प्रयास गर्दा पनि कसैले किनेनन् । त्यसैले नेपाल सरकारको सम्पति भयो ।'

पुनले आफ्नो ठूलाकोट पोखराको २८ रोपनी जग्गा पनि बेचेर कृषि औजार कारखानालाई दान गर्न चाहेको लेखेका छन् । उक्त जग्गा बिक्री नभएको पनि उनको भनाइ छ ।