काठमाडौँ — काठमाडौं महानगरपालिकाका प्रमुख बालेन्द्र शाहका नाममा लेखिएको भन्दै सामाजिक सञ्जालमा एउटा स्टाटस भाइरल भइरहेको छ ।

उक्त स्टाटसमा आपत्तिजनक तथा जातीय रूपमा अपमानजनक भाषा प्रयोग गर्दै नेपाल विद्युत् प्राधिकरणका पूर्वकार्यकारी निर्देशक कुलमान घिसिङलाई लक्षित गरिएको दाबी गरिएको छ ।

यो स्टाटसलाई लिएर जनआस्था साप्ताहिकको अनलाइन संस्करणले समेत समाचार प्रकाशित गरेको छ । ‘भावी प्रधानमन्त्री’को यस्तो हुन्छ भाषा ? शीर्षकमा प्रकाशित समाचारमा बालेन्द्रको नामबाट आएको अभिव्यक्तिमा कुलमान घिसिङप्रति आपत्तिजनक तथा जातीय पहिचानसँग जोडिएका शब्द प्रयोग गरिएको उल्लेख गरिएको छ ।

तर बालेन्द्रको आधिकारिक फेसबुक पेज तथा अन्य प्रमाणित सामाजिक सञ्जाल खाताहरू हेर्दा यस्तो कुनै पनि स्टाटस पोस्ट भएको देखिँदैन । हालसम्म उनले उक्त स्टाटस आफ्नै हो वा होइन भन्ने विषयमा सार्वजनिक रूपमा कुनै प्रतिक्रिया दिएका छैनन् ।

भाइरल भइरहेको स्क्रिनसट ‘Aaren Rai (आरेन राई)’ नामक फेसबुक समूहमा ‘प्रिन्स लिम्बु’ नामको अकाउन्टबाट सोमबार बिहान ४ बजेर १३ मिनेटमा पोस्ट गरिएको देखिन्छ । तर सो स्टाटसमा प्रयोग गरिएको भाषा, अत्यधिक अशुद्ध लेखाइ र बालेनको सामान्य लेखनशैलीसँग मेल नखाने शब्द चयनका आधारमा उक्त स्टाटस ‘एडिटेड’ वा नक्कली हुन सक्ने आशंका गरिएको छ ।

हालै कुलमान घिसिङसँगको राजनीतिक दूरी बढेसँगै बालेन्द्र शाहको नाममा तयार पारिएका यस्ता ‘एडिटेड’ स्टाटस र स्क्रिनसट सामाजिक सञ्जालमा व्यापक रूपमा फैलिन थालेका छन् ।