काठमाडौँ — उच्च अदालत पाटनले नाडाको विवादमा तत्काल थप कार्य नगरी यथास्थितिमा राख्न आदेश जारी गरेको छ । उच्च अदालतका न्यायाधीशद्वय टंकप्रसाद गुरुङ र तेजेन्द्रप्रसाद सापकोटा शर्माको इजलासले यस्तो आदेश जारी गरेको हो । 

‘थप कार्यक्रम तत्काल सम्पन्न नगरी यथास्थितिमा राखी उक्त मिति २०८२ पुस ९ मा सुरु भएको साधारणसभा निर्वाचनको प्रक्रियामा अपनाइएका सम्पूर्ण कागजातसहितको फाइल झिकाई लिखित जवाफ परेपछि वा अवधि नाघेपछि अदालतमा विचाराधीन उत्प्रेषणको रिटसमेत साथै राखी नियमानुसार पेस गर्नू,’ आदेशमा भनिएको छ । 

आकाश गोल्छासमेतले दायर गरेको रिटमा उच्च अदालतले यस्तो आदेश जारी गरेको हो । ‘यसमा नाडाको केन्द्रीय कार्यसमितिको निर्विरोध निर्वाचनभइसकेको भन्ने तथ्य उक्त संस्थाको २०८२ पुस २२ को पत्रबाट पुस २५ गते शुक्रबारमा सम्पन्न हुने कार्यक्रमको विवरणबाट देखिँदा निवेदकको पूरक निवेदनबाट माग गरिएबमोजिम निर्वाचन गर्ने कार्य रोकी पाऊँ भन्ने सम्बन्धमा अन्तरिम आदेश जारी गरिरहनुपर्ने अवस्था देखिएन,’ आदेशमा भनिएको छ, ‘संस्थाको २०८२ पुस ९ को साधारणसभा उत्प्रेषणको आदेशले बदर गरी पाऊँ भन्ने समेत निवेदनमा उल्लेख भएको देखिएबाट परिस्थितिमा आधारभूत परिवर्तन भइसकेको सन्दर्भमा पुस २५ गते सम्पन्न गर्ने भनी सो पत्रमा उल्लेख भएका थप कार्यक्रम तत्काल सम्पन्न नगरी यथास्थितिमा राख्नू ।’