परासी — नेपाली कांग्रेसका महामन्त्रीद्वयले आव्हान गरेको विशेष महाधिवेशनका लागि पश्चिम नवलपरासीबाट ३१ जना महाधिवेशन प्रतिनिधिले हस्ताक्षर गरेका छन् ।

दुई वटा निर्वाचन क्षेत्र रहेको जिल्लामा क्षेत्र नम्बर १ बाट १४ जना र क्षेत्र नम्बर २ बाट १७ जना महाधिवेशन प्रतिनिधि काठमाडौं जाने तयारीमा छन् । ५१ जनामध्ये ३१ जना अहिलेसम्म विशेष महाधिवेशनको पक्षमा खुलेर लागेको र अरू साथीहरू पनि जोडिने क्रममा रहेको नेपाली कांग्रेस पश्चिम नवलपरासीका सचिव उमेश चन्द्र यादवले बताए ।

आगामी फागुन २१ मा हुने निर्वाचनका लागि नयाँ नेतृत्व र गतिशील कांग्रेस बनाउन विशेष महाधिवेशनमा सहभागी हुन लागेको महाधिवेशन प्रतिनिधि यज्ञ पौडेलले बताए ।

‘जेनजी आन्दोलन, मुलुकको नयाँ परिस्थिति र  कांग्रेसको पुन:संरचनाको समय यही हो,’ पौडेलले भने, ‘अहिले कुन गुटभन्दा पनि नयाँ नेतृत्वसहित चुनावमा जाने भन्ने हाम्रो एजेण्डा हो ।’