विराटनगर — कतारबाट घर फर्किएकी झापाकी कमला दर्जी शुक्रबारै विमानस्थलतर्फ लागेकी थिइन् । लामो समयपछि घर, आफन्त र प्रियजनसँग भेट्ने खुसीले उनको मन उत्साहित थियो । तर, काठमाडौंबाट उडेको बुद्ध एयरको ९०१ नम्बरको जहाज राति साढे ९ बजेतिर झापाको भद्रपुर विमानस्थलमा अवतरणको तयारीमा थियो । 

तर, उनको खुसीको त्यो पल डरका क्षणमा बदलियो । जहाजले रनवे छोएर सामान्य अवतरणको सट्टा अचानक चिप्लिएर अलि परको घारीमा पुग्यो । कमलाको मुटुले पनि लगभग ठाउँ छाडेको थियो । ‘मन त खुसीले भरिएको थियो, तर केही क्षण मुटुले झन्डै ठाउँ छाड्यो’, कमलाले भावुक हुँदै भनिन्, ‘अझै पनि मुटुको गति तीव्र छ ।’ 

जहाजमा ५१ जना यात्रु थिए । सबै यात्रुहरुले आ–आफ्नै तरिकाले ज्यान जोगाउन सफल भए । कोही झ्याल फुटाएर बाहिर निस्किए, केहीले इमरजेन्सी ढोका खोले । कमलाले भनिन्, ‘हामी त घारीमा जहाज जोतिएपछि बल्ल निस्कियौं ।’ 

त्यो दृश्य यात्रुहरुको आँखामा कहिल्यै नभुलिने अनुभव बन्यो । 

घटनास्थलमा तत्काल प्रशासन र प्रहरी टोली सक्रिय भए । यात्रुहरुलाई सुरक्षित बाहिर निकालियो । घटना तत्काल नियन्त्रणमा भए पनि यात्रुहरुको मनमा भय र राहत दुवै मिसिएको अवस्था थियो ।