विराटनगर,काठमाडौं — कोशी प्रदेशको भद्रपुर विमानस्थलमा शुक्रबार बुद्ध एयरको जहाज रन–वेबाट चिप्लिएको छ । प्रारम्भिक जानकारीअनुसार, जहाज चिप्लिएर धावनमार्गबाट केही बाहिर पुगेको हो । जहाजमा क्षति पुगे पनि यात्रु र चालक दलमा कुनै चोटपटक नभएको बताइएको छ ।

झापाका प्रमुख जिल्ला अधिकारी (सीडीओ) शिवराम गेलालले जहाज रन-वेभन्दा बाहिर गएको भए पनि यात्रु र चालक दल सुरक्षित छन् । तर, जहाजमा क्षति पुगेको छ ।  

जहाज अवतरणको क्रममा रन–वेबाट केही तल चिप्लिएको थियो ।  काठमाडौं–भद्रपुर उडान ९०१ नम्बरको जहाज ओभर रनका कारण ग्रास एरियामा पुगेको जनाइएको छ ।

अहिले यात्रु ओराल्ने प्रक्रिया चलिरहेको छ । सबै यात्रु र चालक दलका सदस्य सकुशल रहेका छन् ।

भद्रपुर विमानस्थल कार्यालयका प्रमुख किशोरकुमार खत्रीका अनुसार अहिले उद्धारको कार्य जारी छ । यो उडान नम्बर ९०१ काठमाडौंबाट ५१ यात्रु लिएर उडेको थियो । 

नागरिक उड्डयन प्राधिकरणका प्रवक्ता ज्ञानेन्द्र भुलका अनुसार, प्रारम्भिक जानकारीअनुसार ५१ जना यात्रु सकुशल छन् । चालक दलबारे जानकारी आएको छैन ।

त्रिभुवन अन्तर्राष्ट्रिय विमानस्थल टर्मिनल कार्यालयका अनुसार, यो घटना ९ बजेतिर भएको हो ।

बुद्ध एयरका निर्देशक रुपेश जोशीले जहाज हिलोमा परेर क्षति भएको प्रारम्भिक जानकारी आएको भन्दै यात्रु र चालक दलका सबै सकुशल रहेको बताए । उनले जहाज चिप्लनुको कारण मौसम हुन सक्ने बताए ।