लुम्बिनी — प्रहरी महानिरीक्षक दानबहादुर कार्कीले समाजमा भयरहित वातावरणमा नागरिकले जीवनयापन गर्न पाउने वातावरणका लागि सञ्चार क्षेत्रको भूमिका महत्त्वपूर्ण रहेको बताएका छन् ।

लुम्बिनी प्रेस क्लबद्वारा आयोजित न्युज फेस्टिवलको समापनमा महानिरीक्षक कार्कीले प्रहरी र सञ्चारकर्मीबीचको सम्बन्धलाई नङ र मासुको रूपमा चित्रित गर्दै लुकेका अपराध बाहिर ल्याउन सञ्चार क्षेत्रले निर्वाह गरेको भूमिका महत्त्वपूर्ण भएको बताए ।

लुम्बिनीस्थित बेबी बुद्धमा सोमबार  न्युज फेस्टिवलको समापन एवं क्लबको स्थापना दिवसको अवसर पारेर आयोजित कार्यक्रममा उनले खोज पत्रकारितामार्फत लुकेका कैयौं अपराध बाहिर ल्याउन सञ्चारकर्मीले सहयोग पुर्‍याइरहेको बताए । ‘कहिलेकाहीँ घटनास्थलमा प्रहरी भन्दा पहिले सञ्चारकर्मी पुगेर अपराधमा संलग्नलाई पक्राउ गर्ने आधार र प्रमाण पाउँदा अनुसन्धानमा पनि सहयोग पुगेको छ,’ उनले भने । अफवाह, मिथ्या र भ्रामक सूचना चिर्न पत्रकारले तथ्यमा आधारित, सन्तुलित र जिम्मेवार समाचार दिएर नागरिकमा चेतनाको स्तर बढाउनु पर्ने उनले बताए ।