काठमाडौँ — तराईका अधिकांश क्षेत्रमा बाक्लो हुस्सु, कुहिरो र शीतलहर देखिएपछि आन्तरिक हवाई उडानमा व्यापक असर परेको छ । पुस ६ गतेदेखि १२ गतेसम्म एक साताको अवधिमा दुईतर्फी गरी कुल ३ सय २८ उडान स्थगित भएका छन् भने ८६ वटा उडान मर्ज गरिएको त्रिभुवन अन्तर्राष्ट्रिय विमानस्थलस्थित आन्तरिक टर्मिनल कार्यालयले जनाएको छ ।

नेपालमा आन्तरिक उडान सञ्चालन गर्ने सातवटा वायुसेवा कम्पनी रहेका छन् । तीमध्ये बुद्ध एयर, यति एयरलायन्स, श्री एयरलायन्स, सीता एयर, तारा एयर, समिट एयर र नेपाल एयरलायन्सले नियमित उडान गर्दै आएका छन् । मौसम प्रतिकूल बनेसँगै यी सबै कम्पनीका उडानहरू प्रभावित भएका हुन् ।

जल तथा मौसम विज्ञान विभागले तराईका अधिकांश स्थानमा हुस्सु, कुहिरो र शीतलहर देखिएपछि नियमित तीन दिने मौसम बुलेटिन जारी गर्दै आएको छ । विभागका अनुसार अधिकांश स्थानमा लागेको हुस्सु मध्याह्नसम्म क्रमशः सुधार हुने गरेको छ । यद्यपि यसले हवाई यातायात मात्र नभई तराईका दैनिक जनजीवन, कृषि, स्वास्थ्य, सडक यातायातलगायत विभिन्न क्षेत्रमा प्रत्यक्ष प्रभाव पारेको जनाएको छ । विभागले सर्वसाधारणलाई आवश्यक सतर्कता अपनाउन आग्रह गरेको छ ।