विराटनगर — पञ्चायतदेखि राजाको सक्रिय शासनकालसम्म सत्ता राजनीतिमा केन्द्रमा रहेका नेता बद्रीप्रसाद मण्डलको मंगलबार ८८ वर्षको उमेरमा विराटनगरमा निधन भएको छ ।

२०६२/६३ सालको जनआन्दोलनपछि राजनीतिक मञ्चबाट क्रमशः ओझेलमा परेका मण्डलको महानगरपालिका–९ घोघापुल चोकस्थित निवासमा सुतेकै अवस्थामा निधन भएको परिवारले जनाएको छ ।

भतिजी जस्मिन मण्डलका अनुसार सोमबार रातिसम्म मण्डलको स्वास्थ्य अवस्था सामान्य थियो । ‘बिहान शौचालय गएर आफैं ओछ्यानमा फर्कनुभएको थियो । त्यसपछि सुतेकै अवस्थामा उहाँको निधन भयो,’ जस्मिनले बताइन् । 

दक्षिण–पूर्वी मोरङको जहदा गाउँपालिका–२ मझारे पुर्ख्यौली थातथलो भएका मण्डल २०३६ सालदेखि पञ्चायती राजनीतिमा प्रवेश गरेका थिए । 

पञ्चायतकालदेखि नै सत्ता राजनीतिमा उक्लिन थालेका मण्डल २०४६ सालपछिको बहुदलीय संसदीय व्यवस्थामा पनि लामो समय प्रभावशाली भूमिकामै रहे । उनी राष्ट्रिय पञ्चायतका सदस्य थिए । २०४२ सालमा केही समय अर्थराज्यमन्त्री बनेका मण्डल पछि वनमन्त्रीसमेत भए ।