काठमाडौँ — नारायणगढ–बुटवल सडक विस्तारअन्तर्गत दाउन्ने खण्डमा कामको गति दोब्बरले बढाउन ऊर्जा, जलस्रोत तथा सिंचाइ, भौतिक पूर्वाधार तथा यातायात तथा शहरी विकासमन्त्री कुलमान घिसिङले निर्माण कम्पनीलाई निर्देशन दिएका छ्न् । 

सडकका कारण सर्वसाधारणले धेरै सास्ती भोग्नु परेको भन्दै मन्त्री घिसिङले उक्त सडकको शनिबार साँझ निरीक्षण गर्दै छिटो काम सक्नुपर्नेमा जोड दिए । दाउन्ने खण्डको निर्माण जनवरीभित्र नै सम्पन्न गर्न मन्त्री घिसिङले निर्माण कम्पनीलाई निर्देशनसमेत दिए । 

'दैनिक ट्राफिक जाम भयो काम भएन, सास्ती खेप्नु परो भनेर सर्वसाधारणको गुनासा आउँछन्,' उनले निर्माण व्यवसायीलाई सँगै राखेर भने, 'अब ढिला हुनु भएन, छिटो काम सक्नु परो, अरु कुरा थाहा छैन ।'

नारायणगढ–बुटवल सडक विस्तार थालेको सात वर्ष पुग्नै लाग्दा पनि दाउन्ने खण्डको सास्ती अझै हटेको छैन । १४ किलोमिटर खण्डमा यात्रु र चालकले दैनिक सास्ती भोग्नुपर्ने बाध्यता छ ।