राजविराज — ज्याला–मजदुरी गरेर परिवारको गुजारा चलाउँदै आएका सप्तरीको हनुमाननगर कंकालिनी नगरपालिका–११, इनर्वाका विष्णु सदाको नयाँ साइकल चढ्ने सपना साकार भएको छ । ‘कान्तिपुर’को ‘घरखर्च’ स्तम्भमा शुक्रबार सदाको दिनचर्या छापिएपछि जिल्ला प्रहरी कार्यालयले उनलाई नयाँ साइकल र चिसोबाट जोगिने लुगा प्रदान गरेको हो ।

घरदेखि ९/१० किलोमिटरको दूरीमा रहेको राजविराजमा ज्याला–मजदुरी गरेर जसोतसो खर्च चलाइरहेका विष्णुको पुरानो साइकल पटक–पटक बाटोमा बिग्रेर झन् समस्या भइरहेको विषय पढेर मन दुख्न पुगेको एसपी गौतमकुमार केसीले बताए ।

‘नयाँ साइकल चढ्ने झन् उहाँको सपना रहेको देखेपछि हामीले सानो सहयोग गरेका छौं,’ उनले भने, ‘हाम्रा सबै प्रहरी साथीहरूको योगदानले उहाँलाई सानो सहयोग गर्न पाउँदा खुसी लागेको छ ।’