काठमाडौँ — प्रभु बैंक लिमिटेडबाट प्रवाह भएको ऋण अपचलनबारे अनुसन्धान गरिरहेको प्रहरीले गुण समूहका अध्यक्ष राजेन्द्र शाक्यलाई बुधबार पक्राउ गर्‍यो । बैंकिङ कसुरसम्बन्धी मुद्दामा अनुसन्धान गर्न उनलाई ललितपुरको जावलाखेल, भनिमण्डलबाट पक्राउ गरिएको ब्युरोका एसएसपी शिवकुमार श्रेष्ठले बताए ।

प्रहरीले उच्च अदालत, पाटनबाट उनलाई हिरासतमा राख्न बुधबार नै अनुमतिसमेत लिएको छ । अनुसन्धानमा संलग्न अधिकृतहरुका अनुसार, शाक्यले बैंकबाट १५ करोड रुपैयाँ ऋण प्रक्रिया नै पूरा नगरी लगेको प्रारम्भिक अनुसन्धानमा देखिएको छ ।

‘बैंकले त्यो रकम शाक्यले सञ्चालन गरेको गुण समूहअन्तर्गतको गुण सिनेमालाई दिएको पाइएको छ,’ एक अधिकृतले भने, ‘त्यो पैसा पछि शाक्यले लाजिम्पाट अपार्टमेन्ट खरिद र अर्को कम्पनीमा लगेको पाइएको छ ।’ बाँकी बैंकको २७ करोड रुपैयाँ लिएर आफ्नो ऋण व्यवस्थापन गरेको समेत पाइएको अनुसन्धान अधिकृतहरु बताउँछन् ।

‘लेयरिङ गरिएको कम्पनीमध्ये एउटा अस्तित्वमै नभएको जस्तो पनि देखिएको छ, त्यसबारे विस्तृत अनुसन्धान भइरहेको छ,’ उनले भने, ‘उहाँसँग बयानसमेत लिएर विस्तृत अनुसन्धान गर्छौं ।’

प्रहरीको दाबीमा, प्रारम्भिक सोधपुछमा शाक्यले समेत ऋणमा गडबडी भएको स्वीकारेका छन् । ‘सीईओसहितका अधिकारीहरुले भनेअनुसार, गरेको भन्ने उहाँको भनाइ छ,’ एक अनुसन्धान अधिकृतले भने ।