काठमाडौँ — सर्वोच्च अदालतले नाबालिग किशोरीहरुको डिम्ब निकालेर महँगोमा बेच्ने होप फर्टिलिटीलाई मुद्दा नचलाउने निर्णयको बदर माग गरिएको रिटमा कारण देखाउ आदेश जारी गरेको छ ।

अधिवक्ता अंकिता त्रिपाठीद्वारा दायर रिटमाथि सुनुवाइ गर्दै सर्वोच्चका न्यायाधीश सुनिलकुमार पोखरेलको इजलासले कारण देखाउ आदेशसँगै अग्राधिकार दिँदै लिखित जवाफ माग गरेको छ । 

१० हजार रुपैयाँको प्रलोभन देखाई नाबालिग किशोरीको डिम्ब निकालेर लाखौँमा बेच्ने गरेको होप फर्टिलिटी एन्ड डाइग्नोस्टिक प्रालिलाई जिल्ला सरकारी वकिलको कार्यालय हुँदै उच्च तथा महान्यायाधिवक्ताको कार्यालयलेसमेत मुद्दा नचलाउने निर्णय गरेका थिए । उक्त निर्णय बदर गर्न माग गर्दै आइतबार रिट दर्ता भएको थियो । 

रिटमा जिल्ला सरकारी वकिलको कार्यालय, उच्च सरकारी वकिलको कार्यालय पाटन, महान्यायाधिवक्ताको कार्यालय र प्रहरीको केन्द्रीय अनुसन्धान ब्युरो सीआईबीलाई विपक्षी बनाइएको थियो ।