एनआरएनए पोर्चुगलका अध्यक्ष बमबहादुर जिसीका अनुसार मनहरी–४, मकवानपुरका तामाङको शव कतार एयरवेजमार्फत दोहा हुँदै काठमाडौँ पठाइएको हो।
काठमाडौँ — गैरआवासीय नेपाली सङ्घ (एनआरएनए) पोर्चुगलले चन्दा उठाएर मकवानपुरका सञ्जय तामाङको शव शुक्रवार नेपाल पठाएको छ। उपचारका क्रममा नोभेम्बर ९ गते स्थानीय अस्पतालमा उनको मृत्यु भएको थियो।
एनआरएनए पोर्चुगलका अध्यक्ष बमबहादुर जिसीका अनुसार मनहरी–४, मकवानपुरका तामाङको शव कतार एयरवेजमार्फत दोहा हुँदै काठमाडौँ पठाइएको हो। शव पठाउनका लागि तीन हजार ९ सय युरो (करिब ६ लाख ४५ हजार रुपैयाँ) खर्च भएको छ।
शव पठाउनका लागि तामाङ समाज, पोर्चुगल तथा मृतकका आफन्तबाट तीन हजार ८ सय ५० युरो र एनआरएनए पोर्चुगलबाट २५७ युरो गरी ४१ सय ७ युरो संकलन भएको थियो। शव पठाउनबाट जोगिएको २०७ युरो परिवारजनलाई हस्तान्तरण गरिएको जनाएको छ। शव पठाउन निरन्तर सहयोग र समन्वय गरेको भन्दै एनआरएनए सचिव अर्जुन भण्डारीलाई संघले धन्यवाद दिएको छ।
