काठमाडौँ — इजरायलले कृषिका नेपाली विद्यार्थीलाई कृषि क्षेत्रमा र घरमा आधारित सहायक श्रमिक (कियरगिभर)लाई ५ वर्षको दीर्घकालीन रोजगारी दिन भन्दै थप दुई वटा नयाँ प्रोटोकलको मस्यौदा पठाएको छ ।

इजरायल र नेपालबीच भएको श्रम सम्झौता अर्न्तगत थप दुई वटा प्रोटोकल र एकको परिमार्जन हुन लागेको हो । इजरायलसँग दीर्घकालीन सेवा केन्द्र (वेताबोध)मा सहायक श्रमिक पठाउने मात्रै प्रोटोकल छ । यसलाई पनि परिमार्जन सहितको मस्यौदा पठाएको छ ।

‘अहिले हामीसँग इजरायलले पठाएको तीन वटा प्रोटोकलसम्बन्धी मस्यौदा छ । एउटा अस्पताल (वेताबोध)मा रहेका वृद्धवृद्धालाई स्याहारसुसार गर्ने पहिला नै गरिएको प्रोटोकललाई थप परिमार्जन गरी आएको छ । दोस्रो कृषिका विद्यार्थीलाई रोजगारी दिने र तेस्रो घरमा नै बसेर कियरगिभरमा रोजगारी दिने हो,’ श्रम मन्त्रालयका एक अधिकारीले इकान्तिपुरलाई भने,‘तीनवटा मध्ये दुई प्रोटोकल नयाँ हो ।’

श्रम, रोजगार तथा सामाजिक सुरक्षा मन्त्रालयका अनुसार तीन वटै प्रोटोकल छलफल गरी स्वीकृतिको लागि मन्त्रिपरिषद् पुगेको छ । ‘हामीले यसमा आवश्यक छलफल गरिसकेका छौं । यसको अन्तिम तयारीको लागि मन्त्रिपरिषद्‌को विधेयक समितिमा पठाएको छ । यसबाट पारित भएमा हस्ताक्षर गर्ने प्रक्रिया अगाडि बढ्नेछ ।’