विराटगनर — मोरङको लेटाङ नगरपालिका–२ बुधबारेकी १३ वर्षीया अंशु गौतमको शव चार सातादेखि धरानस्थित बीपी कोइराला स्वास्थ्य विज्ञान प्रतिष्ठानमा छ ।

घटनाकाे कारण र संलग्नकाे पहिचान नभएकाे भन्दै पीडितका परिवारले शव बुझ्न मानेका छैनन् । बलात्कार पछि हत्या भएको परिवारको आरोप छ । प्रहरीले अझैसम्म घटनाको सुराक पाउन सकेकै छैन । तर, मिहिन ढंगले अनुसन्धान भइरहेको प्रहरीको भनाई छ । जिल्ला प्रहरी मोरङका प्रमुख एसपी कवित कट्वालले सुक्ष्म रुपमा अनुसन्धान भइरहेकाले सक्दो चाँडो सत्यतथ्य सार्वजनिक गर्ने बताए । 

२१ असोज कोजाग्रत पूर्णिमाको दिन दिउँसो अंशु घरबाट ‘पिङ खेल्न जान्छु’ भन्दै निस्किएकी थिइन् । त्यसपछि उनी फर्किएर आइनन् । साँझसम्म छोरी घर नफर्किएपछि परिवारले गाउँ–टोल खोजे । साथीसंगीलाई सोधे । नजिकैको जंगल चहारे । तर, उनको अत्तोपत्तो भएन । अन्ततः प्रहरीमा निवेदन दिए । 

प्रहरीमा निवेदन दिएको १८ औं दिन अर्थात ७ कात्तिकमा घरदेखि करिब ४ किलोमिटर टाढाको चिसाङ साझेदारी वन क्षेत्रमा एउटा चिन्नै नसक्ने अवस्थाको शव घाँस काट्न गएका स्थानीयले फेला पारे । 

कुहिएको शरीर, छुट्टिएको टाउको, क्षतविक्षत अवस्थाको पहिचान गर्नसमेत कठिन शव परिवारले चप्पल र कपडाका आधारमा पहिचान गरिएको थियो । ‘हराएको १८ दिनपछि भेटिएको शव पूरै डिकम्पोज भइसकेको थियो’, एसपी कट्वालले भने, ‘त्यसकारण पनि सत्यतथ्य बाहिर ल्याउन मिहिन अनुसन्धान भइरहेको हो ।’ 
अंशुको परिवारले छोरीको बलात्कारपछि हत्या भएको जिकिर गर्दै संलग्नलाई पक्राउ नगरेसम्म शव नबुझ्ने अड्डी कसेपछि शव अस्पतालबाट उठ्न नसकेको हो । 

घटनापछि जिल्ला प्रहरीको विशेष टोली, प्रदेश प्रहरी, अपराध अनुसन्धान व्युरो (सीआईबी) लगायतको टोली सुक्ष्म अनुसन्धानमा खटिरहेका छन् । पोष्टमार्टम रिपोर्टमा पनि मृत्युको कारण खुल्न सकेको छैन । रिपोर्टमा करिब दुई साताभित्र मृत्यु भएको भन्ने उल्लेख छ ।