काठमाडौँ — नेपाल पत्रकार महासंघको केन्द्रीय समिति बैठक सल्लाहकार मनोनयनको विषयमा विवाद हुँदा अनिश्चितकालका लागि स्थगित भएको छ ।

महासंघको विधानअनुसार सल्लाहकार मनोनयन गर्ने प्रक्रियामा नेपाल प्रेस युनियनमा आबद्ध महासंघका केही पदाधिकारी र सदस्यहरूले असहमति जनाएपछि बैठक बस्दै नबसी स्थगित भएको एक पदाधिकारीले बताए । 

महासंघको विधानमा निवर्तमान अध्यक्षलाई सल्लाहकार मनोनयन गर्ने व्यवस्था छ। तर, प्रेस युनियन निकट केही पदाधिकारी तथा सदस्यहरूले विधानको उक्त व्यवस्थालाई बेवास्ता गर्दै तत्कालीन कार्यबाहक अध्यक्ष बाला अधिकारीलाई पनि सल्लाहकारमा मनोनयन गरिनुपर्ने माग राखेपछि बैठक अवरुद्ध भएको महासंघका एक केन्द्रीय सदस्यले बताए ।

ती सदस्यले भने- 'विधानविपरीतको माग र अडानका कारण महासंघको केन्द्रीय समिति बैठक प्रभावित भएको हो । शनिबार बिहान १० बजेका लागि काठमाडौंको सिद्धार्थ कटेजमा बोलाइएको बैठक निर्धारित समयमा बस्न सकेन र दिनभरि विवादमै बित्यो ।'

ती सदस्यका अनुसार अध्यक्ष निर्मला शर्माले विधानअनुसारका सल्लाहकारहरू, जसमा निवर्तमान अध्यक्ष विपुल पोखरेल, निकटतम प्रतिस्पर्धी रमेश बिष्ट र त्यसअघिका अध्यक्ष गोविन्द आचार्य लगायतका व्यक्तिहरूको मनोनयनको जानकारी सहितको चिठी बिहानै पठाइसकेका थिए । उनीहरूमध्ये केही बैठकमा उपस्थित थिए । तर, प्रेस युनियन निकट पदाधिकारिहरूले बाल अधिकारीलाई पनि सल्लाहकारमा राख्न भन्दै विवाद गरेका थिए ।