काठमाडौँ — राष्ट्रिय युवा परिषद्‍ले प्रधानमन्त्री सुशीला कार्कीलाई आफ्नो वार्षिक प्रतिवेदन बुझाएको छ । शुक्रबार सिंहदरबारस्थित प्रधानमन्त्री तथा मन्त्रिपरिषद्‍को कार्यालयमा प्रतिवेदन बुझाइएको हो ।

आफ्नो वार्षिक क्रियाकलाप तथा गतिविधिसहित परिषद्‍ले तयार गरेको १५४ पृष्ठको प्रतिवेदन परिषद्‍का पदेन अध्यक्षसमेत रहेका युवा तथा खेलकुदमन्त्री बब्लु गुप्ताले प्रधानमन्त्री कार्कीलाई बुझाएका हुन् ।

प्रतिवेदन बुझ्दै प्रधानमन्त्री कार्कीले विचलनमा गएका युवालाई सही मार्गदर्शन गर्नुपर्ने बताइन् । उनले युवा मन्त्रालय, युवा परिषद् र अन्य सम्बद्ध निकय मिलेर युवाको पक्षमा नतिजामुखी काम गर्नुपर्नेमा जोड दिइन् ।

प्रतिवेदनवारे प्रकाश पार्दै कार्यकारी उपाध्यक्ष सुरेन्द्र बस्नेतले परिषद्‍ले युवा नेतृत्व विकास, क्षमता विकास, सिप विकास र उद्यमशीलताको विकासममा महत्वपूर्ण काम गर्दै आएको बताए । उनले सीमित स्रोत र साधनका बाबजुद युवा सशक्तिकरणमा परिषद्‍ले निरन्तर जोड गर्दै आएको बताए ।

कार्यक्रममा मुख्यसचिव एकनारायण अर्याल, खेलकुद मन्त्रालयका सचिव हरिप्रसाद लम्साल, प्रधानमन्त्री कार्यालयका सचिव राजकुमार श्रेष्ठ, परिषद्‍का प्रशासकीय प्रमुख गेहनाथ गौतमलगायतको उपस्थिति थियो ।