ट्रेकिङ एजेन्सिज एसोसिएसन अफ नेपाल (टान) ले सदस्य एजेन्सीहरूलाई पर्यटक तथा पदयात्रीहरूलाई निषेधित क्षेत्रमा पठाउने निर्णय गर्नुअघि मौसमी अवस्थाको सावधानीपूर्वक मूल्यांकन गर्न आग्रह गरेको छ ।
काठमाडौँ — ट्रेकिङ एजेन्सिज एसोसिएसन अफ नेपाल (टान) ले आफ्ना सदस्य एजेन्सीहरूलाई निषेधित क्षेत्रमा जाने पर्यटकको पदयात्रा अनुमति पत्र सम्बन्धमा सूचना जारी गर्दै हाल देशभर भइरहेको असिना, हिउँपात र पहिरो जस्ता प्रतिकूल मौसमी अवस्थाका कारण सावधानी अपनाउन अनुरोध गरेको छ ।
महासचिव सोनाम ग्याल्जेन शेर्पाद्वारा हस्ताक्षरित सूचना अनुसार, विभिन्न जिल्लाहरूमा निरन्तर परेको भारी वर्षा र हिउँका कारण निषेधित क्षेत्रभित्रका पदयात्रा मार्गहरू प्रभावित भएका छन् । यसबारे सम्बन्धित जिल्ला प्रशासन कार्यालय, सुरक्षा निकाय तथा स्थानीय तहहरूले पनि सतर्कता सूचना जारी गरेका छन् ।
यस कारण टानले सदस्य एजेन्सीहरूलाई पर्यटक तथा पदयात्रीहरूलाई निषेधित क्षेत्रमा पठाउने निर्णय गर्नुअघि मौसमी अवस्थाको सावधानीपूर्वक मूल्यांकन गर्न आग्रह गरेको छ । साथै, स्थानीय निकाय तथा प्रशासनबाट जारी सूचनाहरूमा ध्यान दिन र यात्रुहरूको सुरक्षालाई उच्च प्राथमिकता दिन टान केन्द्रिय कार्यालयले अनुरोध गरेको छ।
टानका अनुसार, प्रभावित जिल्लाहरूमा हाललाई निषेधित क्षेत्र पदयात्रा अनुमति पत्र जारी वा स्वीकृत नहुने अवस्थासमेत आउन सक्छ । त्यसैले टानले आफ्ना सदस्यहरूलाई सम्बन्धित निकायसँग निरन्तर समन्वयमा रहन तथा आपतकालीन अवस्थाहरूमा टानका जिम्मेवार व्यक्तिहरूसँग सम्पर्क गर्न आग्रह गरेको छ । जसमा सागर पाण्डे, अध्यक्ष, सोनाम ग्याल्जेन शेर्पा, महासचिव, बिक्रम गुरुङ, विभाग संयोजक, किरणप्रसाद आचार्य, अध्यक्ष, टान गण्डकी र रामचन्द्र सापकोटा, टानका प्रमुख कार्यकारी अधिकृत छन् ।
टानले कठिन समयमा पदयात्राबाहक एजेन्सीहरूबीच समन्वय, सूचना आदानप्रदान र सुरक्षाप्रति सचेत रहन विशेष आग्रह गरेको छ ।
