काठमाडौँ — मंसिरमा महाधिवेशन गर्ने गरी तालिका नै ल्याउन नहुने अडानमा रहेको कांग्रेसको संस्थापन पक्ष केही लचक देखिएको छ । कांग्रेसका दुई महामन्त्रीद्वय गगन थापा र विश्वप्रकाश शर्माले चुनाव अगाडि नै नियमित वा विशेष महाधिवेशन सम्पन्न गर्नुपर्ने अडानबाट पछि नहट्ने बताउँदै आएका छन् ।

संस्थापन पक्षको बुधबार ललितपुरस्थित धोबीघाटमा बसेको भेलाले क्रियाशील सदस्यता टुंग्याउनेदेखि तल्लो तहका कमिटीका अधिवेशनका तालिका मंसिरभित्रै ल्याएर केन्द्रको अधिवेशन चुनाव पछाडि गर्नुपर्ने धारणा राखेको छ ।

कांग्रेस नेता कृष्णप्रसाद सिटौला र विमलेन्द्र निधिले चुनाव अगाडि मंसिरभित्र क्रियाशील सदस्यताको टुंगो लगाएर चुनाव पछाडि अधिवेशन तोक्दा राम्रो हुने बताएका थिए । कार्यतालिकाका बारेमा संस्थापन पक्षले मध्यमार्गी धारमा रहेका नेता शेखर कोइरालासँग पनि परामर्श गरिरहेका छन् । कोइरालाले मंसिरमा नियमित महाधिवेशनको तालिका ल्याउने र काम गर्दै जाँदा नभ्याइएमा केही समयका लागि सार्न सकिने उपाय सुझाउँदै आएका छन् ।

भेलामा सहभागी केन्द्रीय सदस्य रामहरि खतिवडाले पार्टी एकताका लागि मध्यमार्गी कुनै उपाय खोज्ने दिशामा छलफल भइरहेको बताए । ‘मुलुकमाथि संकट आएका बेलामा कांग्रेस विभाजित मतका साथ जान हुन्न । एकता भएर जानुपर्छ । त्यसका लागि म तयार छु,’ खड्काको भनाइ उदृत गर्दै खतिवडाले भने,‘समाधानको बाटो कसरी खोज्ने भन्नेबारेमा अहिले सबै पक्षसँग संवाद चलिरहेको छ ।’