काठमाडौँ — झोंछेका रैथाने गणपतिलाल श्रेष्ठको नाम आइतबार बिहानैदेखि चर्चामा आयो । जेन-जी विद्रोहपछि बनेको सुशीला कार्की नेतृत्वको उनी संस्कृति पर्यटन तथा नागरिक उड्डयनमन्त्री बन्ने समाचार सार्वजिनक भएपनि एकैछिनमा उनलाई दिने भनेको मन्त्रालयको फेरिएको खबर सार्वजनिक भयो । पछि उनको नाम भूमि व्यवस्था तथा सहकारीमन्त्रीमा सिफारिस गरियो । तर यसमा गणपतिलालले असन्तुष्टी जनाए । 

एक दशकभन्दा लामो समयदेखि काठमाडौं उपत्यकाको सम्पदा बचाउने अभियानमा सक्रिय श्रेष्ठलाई मन्त्रीको रुपमा किन सिफारिस गरिएको थियो र किन उनी फेरिएको जिम्मेवारीमा जान तयार भएनन् भन्ने विषयमा इकान्तिपुरले उनीसँग गरेको कुराकानीको सम्पादित अंश :

तपाईंलाई मन्त्रालय दिने विषय कसरी टुंगो लागेको थियो ? 

मलाई संस्कृति पर्यटन तथा नागरिक उड्डयन मन्त्रालय दिने भनिएको थियो । हिजो ऊर्जामन्त्री, गृहमन्त्री र प्रधानमन्त्रीले बेलुका निवासमा बोलाएर फाइनल गरेर आज बिहान सिफारिस र सपथ एकैचोटि गर्ने कुरा थियो । बिहान एक घन्टामा मन्त्रालय चेन्ज गरियो ।

यसबारे तपाईंलाई विस्तृत जानकारी गराइएन ? 

यस विषयमा मलाई विस्तृत जानकारी गराइएन । मैले गएर प्रधानमन्त्रीसँग फेस टु फेस कुरा गर्न जाँदा उहाँले चित्तबुझ्दो जवाफ दिनुभएन । 

तपाईंले के कुरा गर्नुभयो अनि जवाफ के पाउनुभयो ? 

मैले हिजोको कमिटमेन्ट के हो ?, अनि आज एक्कासि चेन्ज किन भनेर प्रश्न सोधेँ । भूमि सुधार मन्त्रालयमा मेरो नाम राखियो । यसबारे मलाई सोध्नुभयो त भनेर मैले सोधेँ । मैले यसबारे सञ्चारमाध्यमबाट मात्रै थाहा पाएँ । अर्को कुरा भनेको संस्कृति पर्यटन तथा नागरिक उड्डयन मन्त्रालय त उहाँहरुले नै मेरो बारेमा रेकी गरेर यो मन्त्रालयमा नेतृत्व गरिदिनुपर्‍यो भनेर सबैको सामू अनुरोध गर्नुभएको थियो । उहाँले त मेरो भावना र त्यति धेरैको भावनासँग खेलीदिनुभयो नि त ।