आँचलको आत्महत्या प्रकरणमा पाँचजनामध्ये सञ्जु विक पक्राउ परेका छन् भने अन्य चारजना फरार प्रतिवादी बनाइएकै अवस्थामा मुद्दा दायर भएको छ।
What you should know
काठमाडौँ — टिकटकर आँचल नाथको मृत्यु प्रकरणमा जिल्ला अदालत काठमाडौंमा पाँच जनाविरुद्ध आत्महत्या दुरुत्साहनको मुद्दा दायर गरिएको छ । जिल्ला प्रहरी परिसर, काठमाडौंले गरेको अनुसन्धानका आधारमा उक्त मुद्दा दायर गरिएको हो ।
अदालतमा दायर मुद्दामा नरेफाँटका २६ वर्षीय सञ्जु विक, अनु भनिने उर्मिला विक, सरु भनिने सरस्वती भण्डारी, २२ वर्षीय राजेश बुढा र लक्ष्मी बुढालाई प्रतिवादी बनाइएको छ । उनीहरूमध्ये सञ्जु विक मात्र पक्राउ परेका छन् भने बाँकीलाई फरार प्रतिवादी बनाएर मुद्दा दायर गरिएको छ ।
केही म्युजिक भिडियोमा देखिएकी आँचल मोडलिङमा समेत सक्रिय थिइन् । दुई वर्षअघि जापानी भाषा अध्ययन गर्न गाउँबाट काठमाडौं आएकी उनी भक्तपुरमा डेरा लिएर बस्दै आएकी थिइन् ।
टिकटकमार्फत सञ्जुसँग चिनजान भएकी आँचल सरस्वती भण्डारीसँग केही समयदेखि विवादमा रहेको भन्दै उनका भिनाजु प्रकाशनाथ योगीले दिएको जाहेरीमा उल्लेख छ ।
‘सञ्जु विककी श्रीमती उर्मिलाले समेत विवादमा प्रोत्साहन दिने गरेकी थिइन्,’ जाहेरीमा भनिएको छ, ‘त्यही विषयमा असोज ९ गते अपराह्न ४ बजे सञ्जुको ग्यारेजमा छलफल भएको थियो । त्यस क्रममा उनीहरूले गालीगलौज गर्दै जथाभावी मुख छाडेर झगडा गरेका थिए र ज्यान मार्ने धम्की समेत दिएका थिए ।’
प्रहरीका अनुसार त्यसपछि आँचलले शरीरमा पेट्रोल छर्किएर आफैँलाई आगो लगाएकी थिइन् । गम्भीर रूपमा घाइते भएपछि सञ्जुले उनलाई सिनामंगलस्थित काठमाडौं मेडिकल कलेजमा उपचारका लागि लगेका थिए । उपचारका क्रममा चिकित्सकहरूले उनको मृत्यु भएको घोषणा गरेका थिए ।
सञ्जुले भने प्रहरीलाई दिएको बयानमा आफूहरूले धम्की नदिएको दाबी गरेका छन् । ‘आगो बलिरहेको देखेपछि मैले ज्याकेटले निभाउन खोजेँ, त्यसले नभएपछि पानी खन्याएँ र ब्ल्याङ्केटले छोपेर ट्याक्सीमा अस्पताल लगेँ,’ उनले भनेका छन् ।
मुलुकी अपराध संहिता, २०७४ को दफा १८५ अनुसार, ‘कसैलाई आत्महत्या गर्न उक्साउने वा त्यस्तो परिस्थिति खडा गर्ने काम गर्न नहुने’ भनिएको छ । यस्तो कार्य गर्नेलाई पाँच वर्षसम्म कैद र ५० हजार रुपैयाँसम्म जरिवानाको सजायको व्यवस्था छ ।
