काठमाडौँ — कांग्रेसका युवा नेताहरुले सभापति शेरबहादुर देउवालाई ध्यानाकर्षण पत्र पठाउँदै मंसिर मसान्तभित्रै नियमित महाधिवेशन गर्न माग गरेका छन् । उनीहरुले मंगलबारदेखि सुरु हुने केन्द्रीय कार्यसमितिको बैठकले १५ औं महाधिवेशनको सुनिश्चिता गर्दै समयतालिका आउनुपर्ने माग गरेका छन् ।

‘कांग्रेसको १५ औं महाधिवेशनका सम्बन्धमा विधिवत र नियमित महाधिवेशन मात्र सबै तह (वडादेखि केन्द्रसम्म) युवा पुस्ताको सम्मानजनक सहभागिताको माध्यम हो । पार्टीको पुनर्गठन, पुस्तान्तरण र रुपान्तरणको प्रक्रियालाई वैधानिकरुपमा अघि बढाउन सक्ने एक मात्र विकल्प भनेको विधिवत नियमित महाधिवेशन मात्रै हो भन्ने हाम्रो निष्कर्ष हो’ युवा नेताहरु रंजित कर्ण, दीपक भट्टराइ, सरोज थापा, मनहरी श्रेष्ठ, बद्री अर्याल, पुष्पकुमार शाही, शिव रिमाल, भूपेन्द्रजंग शाहीलगायतले जारी संयुक्त विज्ञप्तिमा भनिएको छ, ‘अन्यथा यो वा त्यो बाहनामा महाधिवेशन गर्न असक्षम भएमा मौजुदा कार्यसमिति भंग गरिनुपर्छ ।’

फागुन २१ गतेको लागि घोषणा भएको निर्वाचनमा पार्टीको सक्रिय सहभागिता तथा प्रतिनिधिसभाको पुन:स्थापनाको सम्बन्धमा राजनीतिक र एजेन्डागत छलफल गरी पार्टीको आधिकारिक धारणा निर्माण गर्न समेत उनीहरुले माग गरेका छन् । कांग्रेसले तय गर्ने साझा धारणालाई कार्यकर्ता पंक्ति र जन समुदायमा सम्प्रेषण गरिनुपर्ने उनीहरुको माग छ ।