रौतहट — लगातारको वर्षासँगै चलेको हावाहुरीले रुख ढालेपछि शनिबार साँझदेखि पूर्व-पश्चिम राजमार्गमा यातायात अवरुद्ध भएको छ । रौतहटको चन्द्रनिगाहपुर-बाग्मती खण्डको जंगलमा रुख ढलेपछि गाडी रोकिएका हुन् ।

राजमार्गछेउको सालको रुख ढलेर साँझ ६:३० बजेदेखि सवारी अवरुद्ध भएको जिल्ला ट्राफिक प्रहरी कार्यालय रौतहटले जनाएको छ ।

अहिले त्यस क्षेत्रमा दुवैतिर सवारी रोकिएको छ । सुरक्षाकर्मीहरू रुख पन्छाउन खटिएका छन् । अहिले जिल्लाभर भारी वर्षा भइरहेको छ । वर्षासँगै चलेको हावाहुरीले रुख ढलेर सवारी अवरुद्ध भएको हो ।