नवलपरासी — चितवन राष्ट्रिय निकुन्जमा जिप सफारी पुन: खुला गरिएको छ ।

वर्षाका कारण गत असार १६ गतेदेखि बन्द गरिएको चितवन राष्ट्रिय निकुञ्ज भित्रको जिप सफारी आजदेखि पुनः खुलाइएको हो । वर्षा सकिएपछि निकुञ्जमा घुम्ने पर्यटकको संख्या बढ्ने भएकाले जिप सफारी सञ्चालन गर्न अनुमति दिइएको हो ।

निकुञ्ज प्रवेशका लागि सुरक्षापोष्ट भएका स्थानबाट मात्र जंगल प्रवेशको अनुमति दिने प्रचलन  छ । वर्षा सकिएपछि निकुञ्ज भित्रका खोलानाला तरेर जिपमा पर्यटक आउजाउ गर्न मिल्ने भएपछि सफारी खुलाइएको निकुञ्जले जनाएको छ ।

चितवन निकुञ्जका सूचना अधिकारी अविनाश थापाका अनुसार यस वर्ष पूर्वी नवलपरासीको अमलटारीबाट ५ वटा, रजहर नजिकको कुजौली पोष्टबाट २ वटा, चितवनको माडीबाट १ वटा जिपलाई निकुञ्ज भित्र जाने अनुमति दिइएको छ । त्यस्तै, सौराहाबाट ३२ र कसराबाट १६ वटा जिप प्रवेश गर्ने अनुमति दिइएको छ ।