काठमाडौँ — भ्रष्टाचार नियन्त्रण र सुशासन बहालीसहितका माग राखेर ‘जेन–जी’ पुस्ताले आह्वान गरेको प्रदर्शन भड्किएपछि सिर्जित तोडफोड र आगजनीमा अख्तियार दुरुपयोग अनुसन्धान आयोगका केन्द्र र प्रदेशस्थित कार्यालयमा पनि ठूलो धनमाल नष्ट भएको छ ।

२४ भदौको आगजनीबाट टंगालस्थित अख्तियारको केन्द्रीय कार्यालयमा रहेको ‘विधि विज्ञान प्रयोगशाला’को संरचना र त्यसका उपकरणहरु जलेर नष्ट भएका छन् । भ्रष्टाचारको अनुसन्धानका क्रममा अख्तियारले यही प्रयोगशालाबाटै फरेन्सिक जाँच गर्दै आएको थियो । अख्तियारकै पहिलो तलामा रहेको पुस्तकालय पनि जलेर खरानी भएको छ । अख्तियारको प्रशासन महाशाखा जल्दा त्यहाँ रहेका कर्मचारी विवरण र आन्तरिक प्रशासनिक दस्तावेजहरु जलेका छन् । केही कम्प्युटर, हार्ड डिस्कसहितका धनमाल पनि लुटपाट भएको र लुटिएका उपकरणहरु बुझाउन सम्वद्ध पक्षहरुलाई अपिल गरिएको अख्तियारले जनाएको छ । केही उपकरणहरु फिर्ता हुन थालेको र अझै थुप्रै आउन बाँकी छन् ।

अख्तियारका प्रवक्ता राजेन्द्रकुमार पौडेलका अनुसार टंगालमा भ्रष्टाचार अनुसन्धानसँग सम्बन्धित फाइलहरुमा भने कुनै क्षति हुन पाएन । ‘२४ भदौको तोडफोड र आगजनीबाट टंगालस्थित कार्यालयमा अनुसन्धानका फाइलहरुमा कुनै क्षति नभएपनि फरेन्सिक ल्याब, प्रशासन महाशाखाका दस्तावेज/विवरण, पुस्तकालय जलेको छ, टंगालमै पार्किङ गरेर राखेका १८ वटा चारपांग्रे र ६८ वटा मोटरसाइकल पनि जलेका छन्,’ पौडेलले कान्तिपुरसँग भने, ‘प्रदेश तहका कार्यालयका भवन र अनुसन्धानका फाइलहरु जल्न पुगेका छन्, यद्यपि प्रदेशका अनुसन्धानसँग जोडिएका फाइलहरुको अभिलेख केन्द्रमा पनि हुन्छ, यसलाई रिकभर गरेर जल्नभन्दा अघिकै अवस्थाबाट काम गर्न समस्या छैन ।’