‘हामी नेपाल’ संस्थाका अध्यक्ष सुदन गुरुङले पनि महर्जन आफ्नै संस्थाको स्वयंसेवक भएको पुष्टि गरे । उनका अनुसार प्रदर्शनको पहिलो दिन हामी नेपालले ४० जना स्वयंसेवक परिचालन गरेको थियो । तर उनी मात्र फरक पोसाकमा उपस्थित थिए ।

‘उनी जेनिश महर्जन नाम गरेका भाइ हुन् । उनलाई बच्चादेखि नै आर्मीजस्तो हुन मन लाग्ने स्वभाव थियो । त्यसैले त्यो पोसाक लगाएर आएका हुन्,’ गुरुङले भने, ‘जाजरकोटमा भूकम्प जाँदा हामीले आर्मी र नेपाल प्रहरीसँग नजिक भएर काम गरेका थियौं । महर्जन भाइ हाम्रो टिमको कान्छो सदस्य थिए । उनी सबैसँग मिल्थे । उनले यस्तो पोसाक कहाँ पाइन्छ भनेर आर्मीलाई सोधेका रहेछन् । आर्मीले तिमीलाई हो भने हामी दिन्छौं भनेर गिफ्ट गरेको पोसाक हो । उनी अरू बेलामा पनि लगाएर हिँड्छन् ।’

गुरुङका अनुसार महर्जनलाई एम्बुलेन्स र स्वास्थ्य टिमसँग व्यवस्थापन गर्ने जिम्मेवारी तोकिएको थियो । महर्जन १३ वर्षको उमेरदेखि नै हामी नेपालमा स्वयंसेवकका रूपमा काम गर्दै आएको गुरुङले बताए ।

गुरुङका अनुसार प्रदर्शनमा मेडिकल टिम र एम्बुलेन्सको समन्वय गर्न तीनवटा वाकीटकी प्रयोग गरिएको थियो । उनका अनुसार एउटा वाकीटकी महर्जन, अर्को मेडिकल टिम र अर्को एम्बुलेन्सको टिमले बोकेको थियो । वाकीटकी बोक्नुको उद्देश्य घाइतेलाई उद्धार गरेर एम्बुलेन्ससँग सम्पर्क गरी अस्पताल पुर्‍याउने मात्र रहेको गुरुङले जानकारी दिए ।