सहसचिव ढकालले भने-'पछिल्लो विषम परिस्थितिका कारण र सम्माननीयज्यूको सचिवालय पूरा नभएका कारणले ढिलाइ भएको हो अन्यथा त्यस्तो केही पनि होइन । सचिवालय पूरा हुने बित्तिकै अपडेट हुन थाल्छ । अत्यावश्यक विषयहरू भएमा त्यो अपडेट भैहाल्छ ।'

यी एकाउन्टको स्वामित्व कसले लिन्छ ?

प्रधानमन्त्रीको आधिकारिक सामाजिक सञ्जाल अकाउन्टहरू प्रधानमन्त्री तथा मन्त्रिपरिषद्को कार्यालयले नै हेर्ने सहसचिव ढकालले बताए । ढकालका अनुसार, फेसबुक, इन्स्टाग्राम, टिकटक र एक्स (पहिलेको ट्विटर) लगायतका सबै आधिकारिक सामाजिक सञ्जाल एकाउन्टहरूको स्वामित्व प्रधानमन्त्री कार्यालय अन्तर्गत सहसचिवको नेतृत्वमा रहेको निजी सचिवालयसँग हुन्छ । 

ढकालले भने- 'निजी सचिवालयमध्ये सरकारी कर्मचारी (सहसचिव) सम्मिलित सचिवालयले नै यी एकाउन्टहरूको व्यवस्थापन गर्छ । सहसचिव नेतृत्वको निजी सचिवालयभन्दा बाहिर हुँदैन । त्यही व्यक्तिको मोबाइलबाट मात्र अथेन्टिकेट गर्न सकिन्छ । सचिवालय फेरिएलगत्तै हस्तान्तरण हुन्छ । अहिले केही ढिलाइ भएका कारणले गर्दा अपडेट हुन नसकेको हो ।'