काठमाडौँ — गत मंगलबारको प्रदर्शनका क्रममा भएको आगजनी र तोडफोडबाट यातायात व्यवस्था विभागको भवन ध्वस्त भएको छ । आगजनीपछि भवन जीर्ण बनेका कारण तत्काल मर्मत गरेर चलाउन सक्ने अवस्था नभएपछि भवनको विकल्प खोज्न सुरु गरिएको छ ।

तत्कालका लागि भने विभाग परिसरको यात्रु प्रतीक्षालयबाट नियमित काम सुरु गरिएको छ । विभागमा आगजनी भएसँगै नयाँ सवारी चालक अनुमति पत्र (लाइसेन्स) का लागि आवेदन दिने प्रक्रिया बन्द भएको छ ।

उक्त सेवा अहिलेसम्मको तयारी अनुसार दसैंपछि सुरु गर्ने योजना रहेको विभागका उप–महानिर्देशक केशव खतिवडाले बताए । 

‘कार्यालयको डाटा ब्याकअप ठिक छ, आगलागीबाट ठूलो क्षति भएको छ, २० हजार लाइसेन्स छपाई भएर बसेको थियो,’ उनले भने, ‘केही जलेको छ, केही हराएको छ, अझै के कति क्षति भयो भनेर बुझ्ने काम भइरहेको छ ।’

छपाई गर्न राखिएको ५ लाख कार्ड भने अहिलेसम्म सुरक्षित भेटिएको उनले सुनाए । विभागका अनुसार छपाई भएर बसेको लाइसेन्सको क्षतिको मुचुल्का उठाएर पछि पुनः नयाँ छपाई गरेर दिने तयारी विभागले गरिरहेको छ । दैनिक सात वटै प्रदेशबाट ६ देखि ७ हजारले नयाँ लाइसेन्सका लागि फर्म भर्ने गर्थे । जसअनुसार ४ देखि ५ हजार नयाँ लाइसेन्सका लागि ट्रायल पास हुन्थे ।