काठमाडौँ — राष्ट्रिय स्वतन्त्र पार्टीका सांसदहरू डा. तोसिमा कार्की र निशा डाँगीको राजीनामा दिने घोषणा गरेका छन् । कार्की ललितपुरबाट निर्वाचित सांसद हुन् भने डाँगी समानुपातिक सांसद हुन् । 

जेनजी प्रदर्शनकारीमाथि भएको दमनको विरोध गर्दै सांसदहरूले राजीनामाको घोषणा गरेका हुन् । कार्कीले आधिकारीक रूपमा सभामुखलाई राजीनामा पत्र बुझाउने तर अब सांसद पदमा नरहने घोषणा सामाजिक संजालबाट गरेकी छन् ।

'संवेदनाहीन सरकारको कटपुतली बनेको संसदको जिम्मेवरीबाट हट्ने र २०७९ को निर्वाचनको सांसद नरहने घोषणा गर्दछु,' कार्कीको घोषणा छ । उनले आफू जेनजी प्रदर्शनकारीको साथमा रहेकी लेखेकी छन् । 

त्यस्तै, रास्वपा सचेतकसमेत रहेकी सांसद निशा डाँगीले पनि पदबाट राजीनामा गर्ने घोषणा गरेकी छन् । 'देशको ढुकुटी युवालाई मासेर देश बनाउन सकिँदैन । देशका युवा सडकमा लास बन्दै गर्दा, संसद र सरकार कस्का लागि ? म यो सांसद पदमा बस्न सक्दिनँ,' डाँगीको घोषणा छ, 'म एक जेनजीको प्रतिनिधित्व गर्ने भएकाले समेत यो पदमा बस्न सक्दिनँ । म मेरो पुस्तासँगै सडकमा जान चाहन्छु ।'