काठमाडौँ — अमेरिकाबाट थप ३७ नेपाली निष्कासनमा परेका छन् । अमेरिकाको ‘इमिग्रेसन एन्ड कस्टम इन्फोर्समेन्ट’ (आइस) ले निष्कासन गरेका सबै ३७ जनालाई चार्टर विमानबाट बुधबार (सेप्टेम्बर ३) नेपाल फिर्ता गर्न लागेको हो । अध्यागमन विभागका महानिर्देशक रामचन्द्र तिवारीले बुधबार दिउँसो चार्टर विमानबाट उनीहरूलाई ल्याइपुर्‍याउने जानकारी आएको बताए ।

उनीहरूलाई अमेरिकाले ‘उडान नम्बर एन ८२८ एएक्स’ नम्बरको जहाजबाट अपराह्न नेपाल ल्याइने जानकारी आएको छ ।

अमेरिकी राष्ट्रपतिमा डोनाल्ड ट्रम्पले दोस्रो कार्यकाल सुरु गरेयता आधिकारिक कागजात नभएका र ‘आपराधिक’ गतिविधिमा संलग्न रहेको आरोप लागेकासहितका आप्रवासीलाई देश निष्कासन गर्ने योजना कार्यान्वयनमा ल्याएसँगै हालसम्म २ सय १५ नेपाली ‘डिपोर्ट’ भइसकेका छन् । त्रिभुवन अन्तर्राष्ट्रिय विमानस्थल अध्यागमनको अभिलेखअनुसार हालसम्म १ सय ९७ पुरुष र १८ महिलालाई अमेरिकाबाट काठमाडौं ल्याएर छाडिएको छ ।

हालसम्म ‘डिपोर्ट’ भएर नेपाल फिर्ता हुनेमा २८ जिल्लाका रहेकामा थप ३७ जनालाई पनि विमान चार्टर गरेर अमेरिकाले नेपाल ल्याउन लागेको हो । विमानस्थल अध्यागमन कार्यालयका अनुसार यसअघि दुई वटा चार्टर फ्लाइटबाट र बाँकी नियमित उडानबाट डिपोर्ट भएर आएकामा थप ३७ जनालाई विमान चार्टर गरेर नेपाल पठाउने तयारी छ । अमेरिकाले नेपाल सरकारलाई दिएको जानकारीअनुसार डिपोर्ट भएकाहरू बुधबार दिउँसो काठमाडौं आइपुग्नेछन् ।

अध्यागमन विभागका अनुसार हालसम्म अमेरिकाबाट नेपाल पठाइनेमा दाङ, पश्चिम रुकुम, पूर्वी रुकुम, सल्यान, म्याग्दी, पर्वत, बाँके, रोल्पा, बागलुङ, सिन्धुपाल्चोक, काठमाडौं, जाजरकोट, दोलखा, कास्की, कैलाली, कञ्चनपुर, गोरखा, जुम्ला, झापा, डोटी, डोल्पा, धनकुटा, पर्सा, मकवानपुर, मुस्ताङ, मोरङ, सिन्धुली र सुनसरीका छन् । सबैभन्दा बढी दाङ, पश्चिम रुकुम र पूर्वी रुकुमका सबैभन्दा बढी छन् ।

‘डिपोर्ट’ भएर आउनेहरू अधिकांश संगठित गिरोहलाई रकम बुझाएर तल्लो रुट (अवैध बाटो) बाट अमेरिका प्रवेश गरेका देखिएको प्रहरीले जनाएको छ । विभिन्न देशमा सक्रिय गिरोहमार्फत तल्लो रुटबाट अमेरिका पुगेका हुन् ।

अमेरिकी राष्ट्रपति ट्रम्पले २० जनवरी २०२५ बाट दोस्रो कार्यकाल सुरु गरेलगत्तै नेपालसहित विभिन्न देशबाट अमेरिका पुगेर गैरकानुनी रूपमा बसोबास गर्ने आप्रवासीहरूलाई निष्कासन गर्ने नीति लिएपछि त्यहाँको अध्यागमन र भन्सारको संयुक्त संयन्त्रले कागजातविहीन आप्रवासीलाई धरपकड सुरु गरेको थियो । त्यस क्रममा ट्रम्प प्रशासनले अमेरिकामा रहेका नेपालीलाई चार्टर विमानबाट दुई पटकमा ४५ जना र बाँकीलाई नियमित उडानबाट ‘डिपोर्ट’ गरेकामा चार्टर विमानबाटै थप ३७ जनालाई पनि फिर्ता गर्न लागेको हो ।

यसअघि अमेरिकाले २१ फागुन २०८१ मा सात पुरुष र एक महिला गरी ८ जनालाई र गत जेठ २४ मा पुनः ३२ पुरुष र ५ महिलालाई चार्टर विमानबाट नेपाल ल्यार त्रिभुवन अन्तर्राष्ट्रिय विमानस्थल अध्यागमनको जिम्मा लगाएको थियो । पछिल्लो पटक ओम्नी ्रएयर इन्टरनेसनलको कल–साइन एन–४८६ एएक्स चार्टर्ड विमानमा ३७ जनालाई फिर्ता पठाइएको थियो ।

दोस्रो कार्यकालका लागि ट्रम्पले राष्ट्रपतिको जिम्मेवारी सम्हालेयता अमेरिकाबाट जनवरीमा ६ जना, फेब्रुअरीमा १८ जना, मार्चमा ३२ जना, अप्रिलमा २६ जना, मेमा ५८ जना, जुनमा ४२ जना, जुलाईमा १७ जना र अगस्टमा १६ जना नेपाली डिपोर्ट भएर नेपाल आइसेकका छन् ।

निष्कासनको सूचीमा परेकाहरूलाई ‘नियमित उडानबाट’ नेपाल फिर्ता गर्ने विकल्प दिइएकामा त्यसलाई स्वीकार गर्नेहरू नियमित उडानबाटै आउने गरेका र अटेर गर्नेहरू र ‘गम्भीर किसिमको अपराधको कसुर’ लागेकालाई ‘अपराधको पृष्ठभूमि’ हेरेर चार्टर विमानबाट फिर्ता गरिएको बताइन्छ । यसअघि अमेरिकाबाट सन् २०२१ देखि २०२४ सम्म १ सय ४० जना नेपाली निष्कासनमा परेका थिए । अध्यागमन विभागका अनुसार सन् २०२१ मा ३८, २०२२ मा २४, सन् २०२३ मा २५ र सन् २०२४ मा ५३ जनालाई निष्कासन गरिएको थियो ।

तल्लो बाटो (डंकी रुट) बाट महिनौं लगाएर अमेरिका छिर्नेहरूबाट संगठित गिरोहले १ करोड रुपैयाँसम्म असुल्ने गरेको र यसरी रकम लिँदा नै अमेरिका छिर्नेसम्मको ग्यारेन्टी गराइएको प्रहरीले डिपोर्ट भएर आउनेसँग सोधपुछ गर्दा खुलेको छ । तर, गिरोहलाई रकम बुझाउनेहरूले विस्तृत विवरण उनीहरूले खुलाउन चाहेको देखिँदैन । दोस्रो कार्यकाल राष्ट्रपतिको जिम्मेवारी सम्हालेपछि ट्रम्पले गैरकानुनी रूपमा अमेरिका छिरेका र अध्यागमन कानुन उल्लंघन गरेर बसेकालाई आइसमार्फत धरपकड गरी नियन्त्रणमा लिएर सम्बन्धित देश फिर्ताको अभियान चलाइएको छ । 

अमेरिकाले नेपालसहितका मुलुकबाट अमेरिका पुगेका १४ लाख ४५ हजार ५ सय ४९ जनालाई निष्कासनको सूचीमा समेटेर नियन्त्रणमा लिन सुरक्षाकर्मीलाई परिचालन गरेको छ । यसमध्ये सबैभन्दा बढी मेक्सिको, एल साल्भाडोर, भारत, ग्वाटेमाला, होन्डुरस, भेनेजुएलाबाट अमेरिका छिरेकाहरू ‘डिपोर्ट’ को सूचीमा छन् ।