काठमाडौँ — नेपालले सगरमाथा र अन्य हिमाल आरोहणका लागि नयाँ अनुमति शुल्क सोमबारदेखि लागू गरेको छ । सरकारले गत मंसिरमा स्वीकृत गरेको पर्वतारोहण सम्बन्धी (छैटौं संशोधन) नियमावली २०८१ मा शुल्कको नयाँ व्यवस्था गरेको हो ।

त्यही नियमावलीबमोजिम गत पुस २६ गते बसेको मन्त्रिपरिषद्को बैठकले हिमाल आरोहणसम्बन्धी शुल्क वृद्धि गर्ने निर्णय गरेको थियो । मन्त्रिपरिषद्को निर्णयले वृद्धिगरेको शुल्क सोमबारदेखि लागू गरिएको हो ।  एक दशकपछि शुल्क वृद्धि गरिएको यो पहिलो पटक हो । अन्तिम पटक सन् २०१५ को जनवरी १ मा शुल्क परिमार्जन गरिएको थियो ।

पर्यटन विभागका निर्देशक हिमाल गौतमले वसन्त ऋतु (मार्च–मे) मा सगरमाथाको आरोहण गर्ने विदेशी आरोहीका लागि प्रतिव्यक्ति ११ हजार डलरबाट १५ हजार डलर पुगेको बताए । उनले भने -‘यो सोमबारदेखि, शरद ऋतुको सुरुवातसँगै आधिकारिक रूपमा लागू भएको छ ।’

परिमार्जित नियम अनुसार, शरद ऋतु (सेप्टेम्बर–नोभेम्बर) को शुल्क ५५ सय डलरबाट ७५ सय डलर पुगेको छ । जाडो (डिसेम्बर–फेब्रुअरी) र वर्षा (जुन–अगस्ट) यामको अनुमति शुल्क २७ सय ५० डलरबाट ३७ सय ५० डलर प्रतिआरोही पुगेको छ ।