यसबीचमा प्रहरी उनको कोठादेखि आफन्तसम्म खोजी गरिसकेको थियो । आफूले ८५ अंकको प्रश्नको हल गरेको झा बताउँछन् । ‘म कक्षा ९ सम्म विद्यालयमा सधैं प्रथम हुन्थेँ । एसएलसीमा भने अपेक्षित नतिजा आएन । त्यसपछि आर्ट्स विषय रोजे । सन् २०१७ मा त्रिविको सेन्टर डिपार्टमेन्टमा भर्ना भए पनि अध्ययनप्रति मेरो पढाइमा चासो रहेन ।  कोभिडपछि त झन् मास्टर तहको पढाइ सुस्तायो,’ उनले प्रहरीको बयानमा भनेका छन्,‘बरु लोक सेवा आयोगतर्फ ध्यान दिए । अधिकृतदेखि नायब सुब्बा स्तरका परीक्षा दिएँ । अहिले निजी क्षेत्रमा ४० हजार रुपैयाँ मासिक आम्दानी गर्ने जागिरमा लागेको छु ।’ 

उनले प्रहरीलाई आफू मानसिक स्वास्थ्य समस्यामा रहेको पनि बताएका छन् । केही समय उपचार गराए पनि पछिल्लो चरण औषधि सेवन नगरेकोले आफूले त्यस्तो निर्णय लिएको हुन सक्ने उनले बयानमा भनेका छन् । उनले आफ्नै कारणले गल्ती भएको बताउँदै कानुनी सजायको भागिदार बन्न तयार भएको बताएका छन् । प्रहरीले उनको झुटो सूचनाले सार्वजनिक शान्ति र सुरक्षामा खलल पुगेकाले मुलुकी अपराध संहिताअनुसार अभद्र मुद्दा दर्ता गरेर अनुसन्धान गरिरहेको छ ।