काठमाडौँ — चिकित्सा शिक्षा सुधारका अभियन्ता डा. गोविन्द केसीले आइतबार अपराह्नबाट कैलालीको गेटामा सत्याग्रह थालेका छन् । त्यहाँको सहिद दशरथचन्द्र स्वास्थ्य विज्ञान विश्वविद्यालयमा उनले ३ दिने सत्याग्रह थालेका हुन् ।
यसअघि उनले पटक–पटक अनशन बसेका कारण सरकारले उनको मागअनुसार चिकित्सा शिक्षा ऐन जारी गरी चिकित्सा शिक्षा आयोग समेत गठन गरेको छ ।
यस्ता छन् २३ औँ सत्याग्रह थालेका डा. केसीका माग
- १. प्रधानमन्त्री केपी शर्मा ओली र चिकित्सा शिक्षा आयोगको गलत ढंगले निजी मेडिकल कलेजहरुलाई विद्यार्थी सिट संख्या वृद्धि गर्ने निर्णय तुरुन्त फिर्ता लिन, शुल्क वृद्धि नगर्न, सम्झौता अनुसार इलाम, उदयपुर र डडेलधुरामा सरकारी मेडिकल कलेज खोल्न र गेटाको मेडिकल विश्वविद्यालयमा तुरुन्त पूर्ण क्षमतामा अस्पतालको सेवा र शैक्षिक कार्यक्रम सुरु गर्न ।
- २. एकीकृत स्वास्थ्य शिक्षा प्रतिष्ठानसम्बन्धी र विश्वविद्यालय र प्रतिष्ठानका पदाधिकारी नियुक्ति मापदण्डसम्बन्धी ऐन पारित गर्न, ऐनअनुसार मेडिकल शिक्षालाई गैरनाफामूलक बनाउने र सरकारी अस्पताललगायत सबै स्वास्थ्य संस्थामा दरबन्दी वृद्धि गर्न लगायतका यसअघिका सबै सम्झौता र मागहरु कार्यान्वयन तथा पूरा गर्न ।
- ३. लिपुलेकमा अतिक्रमण बन्द गरी नेपालको अतिक्रमित भूमि फिर्ता गर्न भारत सरकारसँग र सो कार्यको सुनिश्चितता गर्न नेपाल सरकारसँग माग गरिन्छ ।
- ४. युक्रेन र गाजामा भइरहेको नरसंहारकारी युद्ध तुरुन्त बन्द गर्न रुस र इजरायलसमक्ष माग गरिन्छ ।
सम्बन्धित समाचार
